1 கோடி மெட்ரிக் டன்னாகும் தமிழக உணவு உற்பத்தி

திருச்சி: இந்த ஆண்டு தமிழக உணவு உற்பத்தி 100 லட்சம் மெட்ரிக் டன்களை தொடும் என உள்ளாட்சித்துறை அமைச்சர் ஸ்டாலின் கூறினார்.

திருச்சியி்ல் நிகழ்ச்சியொன்றில் பேசிய அவர்,

2006ம் ஆண்டு நாங்கள் ஆட்சிப் பொறுப்பேற்றபோது தமிழகத்தில் உணவு உற்பத்தி 61.17 லட்சம் மெட்ரிக் டன்னாக இருந்தது. இதையடுத்து அரசு எடுத்த நடவடிக்கைகள், விவசாயிகளுக்கு வழங்கிய சலுகைகளால் உணவு உற்பத்தி அதிகரித்து வருகிறது.

இந்த ஆண்டு இது 100 லட்சம் மெட்ரிக் டன்னைத் தொடும்.

1989ம் ஆண்டு திமுக அரசு விவசாயிகளுக்கு இலவச மின்சாரம் வழங்கியது. இதை பஞ்சாப், ஆந்திர மாநிலங்களும் அமல்படுத்திவிட்டன.

விவசாயத்துக்கு அரசு மிகுந்த முக்கியத்துவம் அளித்து வருகிறது. இந்த ஆண்டு பட்ஜெட்டில் கூட விவசாயத்துறைக்கு மிக அதிக நிதி ஒதுக்கப்பட்டுள்ளது என்றார் ஸ்டாலின்.