பேநசீர் படம் போட்ட லைட்டருக்கு பாக்.கில் கிராக்கி!

இஸ்லாமாபாத்: பாகிஸ்தானில் மறைந்த முன்னாள் பிரதமர் பேநசீர் புட்டோ உள்ளிட்ட அரசியல் தலைவர்கள் படம் போட்ட சிகரெட் லைட்டர்கள் விற்பனை சக்கை போடு போடுகிறது.

இந்தியாவில் சிகரெட் பிடிப்பது போன்ற படக் காட்சிகளில் நடிக்க வேண்டாம் என்று மத்திய சுகாதாரத்துறை அமைச்சர் அன்புமணி வலியுறுத்துவதற்கு அமிதாப் உள்ளிட்ட பாலிவுட் நடிகர்கள் எதிர்ப்பு தெரிவித்து பேசி வருகின்றனர்.

ஆனால் பாகிஸ்தானிலோ நிலைமை தலைகீழாக உள்ளது. அந்நாட்டு தேசத் தந்தை முகமது அலி ஜின்னா, பாகிஸ்தான் மக்கள் கட்சி தலைவர் ஆசிப் அலி சர்தாரி, மறைந்த அவரது மனைவியும் முன்னாள் பிரதமருமான பேநசீர் புட்டோ உள்ளிட்டோரின் உருவப்படம் அச்சடிக்கப்பட்ட சிகரெட் லைட்டர்கள் விற்பனை கன ஜோராக நடக்கிறது. இருந்தாலும் ஜின்னா படம் கொண்ட லைட்டர்களை வாங்க அதிகமாக யாரும் முன்வருவதில்லையாம்.

இதுமட்டுமல்லாமல் அந்த லைட்டர்களில் ஒரு முனையில் டார்ச் லைட் போல் உள்ளது. லைட்டரில் உள்ள பட்டனை அழுத்தினால் டார்ச்சில் இருந்து முக்கிய தலைவர்களின் உருவப்படங்கள், கட்சிகளின் சின்னங்கள் பிம்பங்களாக பாய்கின்றன.

ராணுவச் சீருடையில் பாக் அதிபர் முஷாரப்பின் படம் கொண்ட லைட்டர்களை பல செயின் ஸ்மோக்கர்கள் வாங்கி குவித்துள்ளார்களாம். இது மட்டுமல்லாமல் அல்காய்தா தீவிரவாத அமைப்பின் தலைவர் பின்லேடன் லைட்டர்களுக்கும் மவுசு அதிகமாம்.

இந்த லைட்டர்களில் இடம் பெற்ற ஒரே பெண் தலைவர் பேநசீர்தான். 3 மாடல்களில் அவரது படங்கள் பொறிக்கப்பட்டுள்ளன. பேநசீர் ஆதரவாளர்கள் நிறைய பேர் இந்த லைட்டர்களை விரும்பி வாங்குவதால் இதற்கு அதிக கிராக்கி என்று ஒரு கடைக்காரர் தெரிவித்தார். ஒரு லைட்டர் விலை ரூ.50. சீனாவில் இருந்து பாகிஸ்தானுக்கு இந்த லைட்டர்கள் குவிந்துள்ளன.

பாகிஸ்தானைப் பார்த்து, நம்ம ஊரிலும் ரஜினி படம் போட்ட லைட்டர்களை புழக்கத்தில் விட்டு 'பத்த வச்சிட்டியே பரட்டை' என்று வசனம் பேச வைத்தாலும் ஆச்சரியப்படுவதற்கில்லை.