ஓபாமாவுக்கு ஓரிகான் மாகாணத்தில் வெற்றி - ஹில்லாரிக்கு கென்டகி

நியூயார்க்: ஓரிகான் மாகாண வாக்கெடுப்பில் பாரக் ஓபாமாவும், கென்டகி மாகாணத்தில், ஹில்லாரி கிளிண்டனும் வெற்றி பெற்றுள்ளனர். வாக்குகள் அடிப்படையில் தொடர்ந்து ஓபாமா முன்னணியில் உள்ளார்.

அமெரிக்க அதிபர் தேர்தலில் போட்டியிடும் ஜனநாயகக் கட்சி வேட்பாளரைத் தேர்வு செய்ய மாகாண அளவில் வாக்கெடுப்பு நடந்து வருகிறது. இதில் பாரக் ஓபாமா தொடர்ந்து முன்னணியில் உள்ளார். ஹில்லாரி பின்தங்கிய நிலையில் இருக்கிறார்.

இந்த நிலையில் முக்கிய மாகாணமான கென்டகி மற்றும் ஓரிகான் ஆகியவற்றில் நடந்த வாக்கெடுப்பில் ஓரிகானில் ஓபாமாவும், கென்டகியில் ஹில்லாரியும் வெற்றி பெற்றுள்ளனர்.

இதில் கென்டகியில் ஹில்லாரி அபாரமாக வெற்றி பெற்றுள்ளார். அதேசமயம், ஓரிகான் வெற்றியின் மூலம் தனது பிரதிநிதிகள் வாக்குகளை அதிகப்படுத்திக் கொண்டுள்ளார் ஓபாமா.

தற்போது ஓபாமா 1638 வாக்குகளுடன் முன்னணியில் உள்ளார். ஹில்லாரி 1482 வாக்குகளுடன் உள்ளார்.

நிலைமை தொடர்ந்து இழுபறியாக இருப்பதால், ஆகஸ்ட் மாதம் டென்வரில் நடைபெறும் சூப்பர் பிரதிநிதிகள் வாக்கெடுப்பில்தான் யார் வேட்பாளர் என்பது இறுதியாகத் தெரிய வரும். அதில் 800 சூப்பர் பிரதிநிதிகள் கலந்து கொள்ளவுள்ளனர் என்பது குறிப்பிடத்தக்கது.