யாஹூ, மைக்ரோசாப்ட் ரசிகர்களை தொடர்ந்து 'சுருட்டும்' கூகுள்

வாஷிங்டன்: அமெரிக்காவில் கூகுள் சர்ச் என்ஜினை பயன்படுத்துவோரின் எண்ணிக்கை மேலும் அதிகரித்துள்ளது.

கடந்த ஏப்ரலில் மட்டும் இன்டர்நெட் சேவையை பயன்படுத்தியோரில் 61.6 சதவீதம் பேர் கூகுளில் தான் அதிகமான 'தேடுதல் வேட்டை' நடத்தியுள்ளனர். இது அதற்கு முந்தைய மாதத்தைவிட 2 சதவீதம் அதிகமாகும்.

ஏப்ரல் மாத தேடுதல் சேவை பயன்பாட்டில் யாஹூவுன் பங்கு 20.4 சதவீதமாகும். அதற்கு முந்தைய மாதத்தைக் காட்டிலும் இது 0.9 சதவீதம் குறைவாகும். இதன்மூலம் தனது வாடிக்கையாளர்களில் சுமார் 1 சதவீதத்தினரை கூகுளிடம் யாகூ இழந்துள்ளது.

அதேபோல் மைக்ரோசாப்டின் மார்ச் மாத வாடிக்கையாளர் பங்கு 9.4 சதவீதமாக இருந்தது. ஏப்ரலில் இது 9.1 ஆக குறைந்தது. இந்த வாடிக்கையாளர்களையும் கூகுள் கவர்ந்திருக்கிறது.

இந் நிலையில் யாஹூவை வாங்க முடியாவிட்டாலும் அதன் சர்ச் என்ஜின் சேவையை மட்டுமாவது வாங்க மைக்ரோசாப்ட் இப்போது முயற்சி மேற்கொண்டுள்ளது.

இந்த ஒப்பந்தம் பற்றிய முழு விவரம் தெரியாவிட்டாலும் ஆன்லைன் சர்ச் மற்றும் அதைச் சார்ந்த விளம்பர சேவையை விரிவுபடுத்தும் மைக்ரோசாப்ட் திட்டத்தின் ஒருபகுதியாக இந்த முயற்சி நடந்து வருவதாகத் தெரிகிறது.