எக்ஸிட் போல்: பாஜக வெல்லும்- என்டிடிவி; காங் வெல்லும்- ஐபிஎன்

பெங்களூர்: கர்நாடகாவில் பாஜக பெரும்பான்மை இடங்களில் வெற்றிபெற்று ஆட்சியைக் கைப்பற்றும் என்று எக்ஸிட் போல் முடிவுகள் தெரிவிக்கின்றன.

கர்நாடகாவில் மொத்தமுள்ள 224 சட்டசபை தொகுதிகளுக்கு 3 கட்டங்களாக வாக்குப்பதிவு நடைபெற்றது. இதில் பாஜகவுக்கு 115 இடங்கள் வரை கிடைக்கும் என்று தேர்தலுக்குப் பிந்தைய எக்ஸிட் போல் கணிப்பில் அறியப்பட்டுள்ளது.

என்டிடிவி நடத்திய எக்ஸிட் போல் கணிப்பில், பாஜகவுக்கு 95 முதல் 115 இடங்களும், காங்கிரசுக்கு 55 முதல் 75 வரையிலும், தேவெ கெளடாவின் மதசார்பற்ற ஜனதா தளத்துக்கு 44-55 இடங்களும், பிற கட்சிகளுக்கு 10 முதல் 15 இடங்களும் கிடைக்கும் என கூறப்பட்டுள்ளது.

தனிப்பெரும்பான்மை பெறுவதற்கு 113 தொகுதிகளைக் கைப்பற்றினாலே போதும் என்பது குறிப்பிடத்தக்கது.

கர்நாடகத்தின் சுவர்ண கன்னட தொலைக்காட்சி நிறுவனமும், சி போர்ஸ் என்ற ஆய்வு நிறுவனமும் இணைந்து நடத்திய கருத்துக் கணிப்பு மற்றும் எக்ஸிட் போலில்,

பாஜகவுக்கு தனிப்பெரும்பான்மை கிடைக்கும் என்றும்,
காங்கிரசுக்கு 50 சீட்டுகளும், மதசார்பற்ற ஜனதா தளத்துக்கு 47 இடங்களும் கிடைக்கும் என்று கூறப்பட்டுள்ளது.

காங்கிரசே வெல்லும்-ஐபிஎன்:

ஆனால், சிஎன்ன்-ஐபிஎன் தொலைக்காசியும் டெக்கன் ஹெரால்ட் பத்திரிக்கையும் இணைந்து நடத்திய எக்ஸிட் போலில் 86 முதல் 95 இடங்களில் வென்று காங்கிரசே தனிப் பெரும் கட்சியாக உருவாகும் என்று தெரிய வந்துள்ளது.

பாஜகவுக்கு 79 முதல் 90 இடங்கள் கிடைக்கும் என்றும், மதசார்பற்ற ஜனதா தளத்துக்கு 45 இடங்கள் வரை கிடைக்கும் என்றும் தெரியவந்துள்ளது.

இதன் மூலம் மீண்டும் யாருக்கும் மெஜாரிட்டி கிடைக்காத தொங்கு சட்டசபை உருவாகும். தேவெ கெளடாவின் ஆதரவுடன் தான் கர்நாடகத்தில் அடுத்த ஆட்சியை யாராலும் அமைக்க முடியும் என தெரியவந்துள்ளது.