'மெமோரியல் டே': லூஸில் விட்ட கூகுள்!

வாஷிங்டன்: அமெரிக்க போர் வீரர்கள் நினைவு தினத்தை கெளரவப்படுத்தத் தவறியதாக கூகுள் இணையதளம் மீது அமெரிக்கர்கள் பாய்ந்துள்ளனர்.

காதலர் தினம் போன்ற விசேஷ தினங்கள், விழாக்கள் உள்ளிட்டவற்றின்போது தங்களது லோகோவில் அதை சிறப்பிக்கும் வகையில் மாற்றம் செய்து, அந்த நிகழ்வுகளை சிறப்பிப்பது இணையதளங்களின் வழக்கம்.

கூகுள், யாஹூ உள்ளிட்ட பிரபல இணையதளங்களும் இதுபோல செய்து வருகின்றன. ஆனால் இப்போது கூகுள் நிறுவனத்துக்கு புதுச் சிக்கல் எழுந்துள்ளது. அமெரிக்காவில் மறைந்த போர் வீரர்களை நினைவு கூறி கெளரவப்படுத்த நினைவுதினம் (மெமோரியல் டே) அனுஷ்டிக்கப்படுகிறது.

இந்த ஆண்டு மெமோரியல் டே-வையொட்டி பல்வேறு இணையதளங்களும், அதை கெளரவப்படுத்தும் வகையில் தங்களது லோகோவை மாற்றி வடிவமைத்திருந்தன.

ஆனால் முன்னணி நிறுவனமான கூகுள் அப்படி எதுவும் செய்யவில்லை. இது அமெரிக்காவில் சலசலப்பை ஏற்படுத்தியுள்ளது.

எது எதற்கோ லோகோவை மாற்றி கொண்டாடும் கூகுள், அமெரிக்காவுக்காக தங்களது இன்னுயிரை நீத்த மறைந்த வீரர்களைக் கெளரவப்படுத்த தனது லோகோவை மாற்றாதது ஏன் என்று பல அமெரிக்கர்கள் கேள்வி எழுப்பியுள்ளனர்.

கூகுள் இப்படி கண்டுகொள்ளாமல் விட்டதற்கு என்ன காரணம் என்று தெரியவில்லை. ஆனால் எம்எஸ்என். காம், பெரிய அளவில் அந்த தினத்தைப் பற்றி செய்திகள், புகைப்படங்களை வெளியிட்டு கலக்கி விட்டது.

கூகுள் ஏன் இப்படி செய்தது என்பதை எந்த 'சர்ச் என்ஜினில்' போய் தேடுவது?