அதிமுக பிரமுகர் மகளை மணக்கும் ஜி.கே.மணி மகன்: ஜெ-ராமதாஸ் பங்கேற்பு
பாமக தலைவர் ஜி.கே.மணியின் மகனுக்கும், திருவள்ளூர் மாவட்டத்தை சேர்ந்த அதிமுக பிரமுகர் வலசை சந்திரசேகரின் மகளுக்கும் திருமணம் செய்ய முடிவு செய்யப்பட்டிருக்கிறது.
இந்த திருமணம் அடுத்த மாதம் நேரு ஸ்டேடியத்தில் நடைபெறும் என்று கூறப்படுகிறது. இதற்கான ஏற்பாடுகளை இரு வீட்டாரும் தீவிரமாக மேற்கொண்டுள்ளனர்.
இதில் டாக்டர் ராமதாஸ் கலந்து கொள்கிறார். அவர்தான் தலைமை தாங்கி திருமணத்தை நடத்தி வைக்கவுள்ளார். பாமக முக்கிய தலைவர்கள் அனைவரும் இதில் பங்கேற்கின்றனர்.
அதேபோல அதிமுக பொதுச் செயலாளர் ஜெயலலிதாவும் திருமண விழாவில் பங்கேற்பார் எனத் தெரிகிறது. இரு தலைவர்களும் ஒரே மேடையில் சந்திக்கக் கூடிய வாய்ப்புகள் உள்ளதாக இரு கட்சியினரும் கூறுகிறார்கள்.
எனவே இரு கட்சியினருக்கும் இந்த திருமண விழா பெரும் எதிர்பார்ப்புகளை ஏற்படுத்தியுள்ளது. அரசியல் வட்டாரத்திலும் புதிய பரபரப்பு ஏற்பட்டுள்ளது.
இந்த திருமண விழா இரு கட்சிகளின் கூட்டணிக்கு அச்சாரமிடுமா என்ற எதிர்பார்ப்பும் ஏற்பட்டுள்ளது.
அதேசமயம், இந்த திருமண விழாவுக்கு முதல்வர் கருணாநிதி வருவாரா என்ற எதிர்பார்ப்பும் எழுந்துள்ளது.