ஆஸி. கிரிக்கெட் வீரர் மெக்கிராத் மனைவி ஜேன் மரணம்

சிட்னி: ஆஸ்திரேலிய முன்னாள் கிரிக்கெட் வீரர் கிளன் மெக்கிராத்தின் மனைவி ஜேன் மார்பகப் புற்று நோய் காரணமாக மரணமடைந்தார்.

ஆஸ்திரேலிய முன்னாள் கிரிக்கெட் வீரர் கிளன் மெக்கிராத்தின் மனைவி ஜேன். 42 வயதான இவர் மார்பகப் புற்று நோயால் பாதிக்கப்பட்டிருந்தார். மெக்கிராத் - ஜேன் தம்பதிக்கு இரு குழந்தைகள் உள்ளனர்.

ஜேனுக்கு மார்பகப் புற்று நோய் பாதிப்பு இருந்தது. கடந்த 1997ம்ஆண்டு மார்பகப் புற்று நோய் கண்டுபிடிக்கப்பட்ட நிலையில், 2003ம் ஆண்டு இடுப்புப் பகுதியில் எலும்பில் புற்று நோய் ஏற்பட்டது தெரிய வந்தது.

இதையடுத்து தீவிர சிகிச்சை எடுத்துக்கொண்டார்.அதன் பின்னர் குணமடைந்தார். ஆனால் 2006ல் மீண்டும் அவரை புற்று நோய் தாக்கியது. இம்முறை அவரது மூளையில் புற்றுநோய் தாக்கியது.

இதையடுத்து அவருக்கு சிகிச்சை தரப்பட்டது. கடந்த மார்ச் மாதம் அறுவைச் சிகிச்சையும் நடந்தது. இந்த நிலையில் சில நாட்களுக்கு முன்பு ஜேனின் உடல் நிலை மோசமடைந்தது. நேற்று காலை அவர் சிட்னியில் உள்ள தனது வீட்டில் உயிரிழந்தார்.

ஜேன் மரணமடைந்தபோது மெக்கிராத்தும், அவரது இரு குழந்தைகளும் உடன் இருந்தனர்.