அன்புமணி விலக வேண்டும்-டாக்டர் கிருஷ்ணசாமி

சென்னை: திமுக கூட்டணியில் இருந்து பாமக நீக்கப்பட்டதை தொடர்ந்து மத்திய அமைச்சரவையில் இருந்து டாக்டர் அன்புமணி நாகரீகத்துடன் விலக வேண்டும் என புதிய தமிழகம் கட்சியின் தலைவர் டாக்டர் கிருஷ்ணசாமி கூறியுள்ளார்.

நிருபர்களிடம் அவர் கூறியதாவது:

திமுக கூட்டணியில் இருந்து பாமக நீக்கப்பட்டதை தொடர்ந்து தன் மானத்துடன் மத்திய அமைச்சரவையில் இருந்து டாக்டர் அன்புமணி விலகியிருக்க வேண்டும். அப்படி செய்வதுதான் அரசியல் நாகரீகம்.

தமிழக அரசை எதற்கெடுத்தாலும் குறை கூறும் டாக்டர் ராமதாஸ் தனது மகன் பொறுப்பு வகிக்கும் மத்திய சுகாதார துறையில் நடக்கும் குளறுபடி பற்றி கண்டிக்காதது ஏன்?.

அகில இந்திய மருத்துவ கவுன்சில் தமிழகத்தில் 3 தனியார் மருத்துவக் கல்லூரிகளுக்கு அனுமதி அளித்துள்ளது. அந்தக் கல்லூரிகளில் அரசு ஒதுக்கீட்டு இடங்கள் வழங்கப்படவில்லை.

மருத்துவ மேற்படிப்பில் பல்வேறு குளறுபடிகள் உள்ளன. அதை ஒழுங்கப்படுத்த அன்புமணி தவறிவிட்டார்.

என்ஜினீயரிங் கல்லூரிகளில் கட்டணம் அதிகம் என்று மாநில அரசை குறை கூறும் டாக்டர் ராமதாஸ் இதுபற்றி பேச மறுப்பது ஏன் என்று தெரியவில்லை.

முதலில் இரட்டை வேடம் போடுவதை ராமதாஸ் நிறுத்த வேண்டும் என்றார் கிருஷ்ணசாமி.