தேர்தலுக்கு ஆயத்தம்: முதல் வேட்பாளர் பட்டியலை வெளியிட்டது பாஜக

டெல்லி: லோக்சபா தேர்தலுக்கான ஆயத்தப் பணிகளில் பாஜக இறங்கியுள்ளது. முதல் வேட்பாளர் பட்டியலை அது வெளியிட்டுள்ளது. இப்பட்டியலில் பிரதமர் வேட்பாளராக அறிவிக்கப்பட்டுள்ள அத்வானி உள்ளிட்ட 6 பேரின் பெயர்கள் இடம் பெற்றுள்ளன.

இடதுசாரிகளின் நிலையில் விரைவில் மத்திய அரசு கவிழும், லோக்சபாவுக்கு இடைத்தேர்தல் தேர்தல் வரும் என பாஜக கூறி வருகிறது. எனவே கட்சியினர் தேர்தலுக்குத் தயாராகுமாறும் அது கூறியுள்ளது.

இதன் முன்னோட்டமாக 6 பேரின் பெயர்கள் அடங்கிய முதல் வேட்பாளர் பட்டியலை பாஜக நேற்று அதிரடியாக அறிவித்தது. இதில் பிரதமர் வேட்பாளராக அறிவிக்கப்பட்டுள்ள எல்.கே.அத்வானி, குஜராத் மாநிலம் காந்தி நகர் தொகுதியில் போட்டியிடுவார் என தெரிவிக்கப்பட்டுள்ளது.

தனது தேர்தல் பிரசாரத்தையும் அத்வானி உ.பி. மாநிலம் கான்பூரிலிருந்து தொடங்குகிறார். இந்த பிரசாரப் பயணத்திற்கு விஜய் சங்கல்ப் பிரசாரம் என பெயர் சூட்டப்பட்டுள்ளது.

முதல் கட்டமாக 160 தொகுதிகளுக்கு வேட்பாளர்களை பாஜக இறுதி செய்து விட்டது.த இருப்பினும் அத்வானி உள்ளிட்ட 6 பேரின் பெயர்களை மட்டும் வெளியிட கடைசி நிமிடத்தில் முடிவெடுக்கப்பட்டது. வேட்பாளர் பட்டியல் குறித்து நேற்று அத்வானி தலைமையில் இரண்டரை மணி நேரம் தீவிர ஆலோசனை நடத்தப்பட்டது.

அத்வானி தவிர்த்த பிற வேட்பாளர்கள் விவரம்: நவ்ஜோத் சிங் சித்து (அமிர்தசரஸ்), வினோத் கண்ணா (குர்தாஸ்பூர்), ஸ்ரீபத் நாயக் (வடக்கு கோவா), ஜி.பி.எஸ். ராவத் (பெளரிகார்வால்), அனுராக் தாக்கூர் (ஹமீர்பூர்)

தனது தேர்தல் பிரசாரத்தை அத்வானி உ.பி.. மாநிலத்திலிருந்து துவக்குவதன் மூலம் அம்மாநிலத்திற்கு பாஜக குறி வைத்திருப்பது தெரிய வருகிறது. இங்கு மட்டும் 80 லோக்சபா சீட்கள் உள்ளன என்பது குறிப்பிடத்தக்கது. எனவே உ.பியில் அதிக அளவிலான சீட்களை வெல்ல பாஜக திட்டமிட்டுள்ளது.

லோக்சபா தேர்தலில் ராஜ்யசபா உறுப்பினர்களாக உள்ள பல மூத்த தலைவர்களை லோக்சபா தேர்தலில் நிறுத்தவும் பாஜக திட்டமிட்டுள்ளதாக கூறப்படுகிறது.

ஆகஸ்ட் மாத இறுதியில் அனைத்து வேட்பாளர்களின் பெயர்களும் இறுதி செய்யப்படும் என பாஜக மூத்த தலைவர் வெங்கையா நாயுடு தெரிவித்துள்ளார்.

இதுகுறித்து கூட்டத்திற்குப் பின்னர் நாயுடு கூறுகையில், வேட்பாளர்களை முன்கூட்டியே அறிவிப்பதன் மூலம் பிரசாரத்திற்கு போதிய அவகாசம் கிடைக்கும். திட்டமிட்டு பிரசாரம் செய்ய முடியும். பூர்வாங்கப் பணிகளை முழுமையாகவும், சிறப்பாகவும் செய்ய முடியும். இதன் மூலம் பிற கட்சி வேட்பாளர்களுக்குப் பெரும் நெருக்கடியைக் கொடுக்க முடியும். எனவேதான் முன் கூட்டியே வேட்பாளர்கள் பெயர்களை அறிவிக்கிறோம் என்றார்.