ரயில்வே இணை அமைச்சர் வேலுவுக்கு டாக்டர் பட்டம்

சென்னை: இந்திய ரெயில்வேயில் பேரழிவு மேலாண்மை ஓர் ஆய்வு என்ற தலைப்பில் ஆய்வு மேற்கொண்ட மத்திய ரயில்வே இணை அமைச்சர் ஆர். வேலுவுக்கு சென்னை பல்கலைக்கழகம் டாக்டர் பட்டம் வழங்கியுள்ளது.

மத்திய ரயில்வே அமைச்சர் வேலு, பாமகவில் சேருவதற்கு முன்பு ஐ.ஏ.எஸ்.அதிகாரியாக இருந்தவர். 2002ம் ஆண்டு அவர் ஓய்வு பெற்றார்.

பின்னர் சென்னை பல்கலைக்கழகத்தின் அரசியல் மற்றும் பொது நிர்வாகத் துறையில் பி.எச்டி. படிப்பில் பதிந்தார். கூடவே இந்தி வகுப்பிலும் இணைந்தார்.

2004ம் ஆண்டு அவர் ரயில்வே இணை அமைச்சர் ஆனார். இதனால் இந்தி படிக்க வாய்ப்பு குறைந்தது. அதேசமயம், பி.எச்.டி. ஆய்வுக்கு நல்ல வாய்ப்பு இருந்தது.

ஆய்வை முடித்த அவர் பல்கலைக்கழகத்தில் ஆய்வுக் கட்டுரையை சமர்ப்பித்தார். தற்போது அவரது ஆய்வு ஏற்றுக் கொள்ளப்பட்டு டாக்டர் பட்டம் கிடைத்துள்ளது.