அணு ஒப்பந்தம்- ரொம்ப 'லேட் ஆகுதே..!'-அமெரிக்கா
டெல்லி: இந்தியா, அணு சக்தி ஒப்பந்தம் மிகவும் தாமதமாகிக் கொண்டிருக்கிறது. இந்தியா மிகவும் மெதுவாக செயல்படுகிறது என அமெரிக்க எம்.பி. கேரி ஆக்கர்மேன் கூறியுள்ளார்.
அமெரிக்க நாடாளுமன்ற காங்கிரஸ் உறுப்பினர் கேரி ஆக்கர்மேன் தலைமையில் எம்.பிக்கள் குழு இந்தியா வந்துள்ளது. டெல்லி வந்த அவர்கள் வெளியுறவுத்துறைச் செயலாளர் எஸ்.எஸ். மேனனை சந்தித்துப் பேசினர்.
பின்னர் ஆக்கர்மேன் செய்தியாளர்களிடம் பேசுகையில், அணு ஒப்பந்த விவகாரத்தில் இந்தியா மிகவும் மெதுவாக செயல்பட்டுக் கொண்டிருக்கிறது. நவம்பரில் அமெரிக்காவில் அதிபர் தேர்தல் நடைபெறவுள்ளது. செப்டம்பருக்குள் இந்தியா தனது நடைமுறைகளை முடித்தால்தான் இப்போதைய ஆட்சிக்குள் ஒப்பந்தத்தை அமல்படுத்த முடியும்.
நமக்கு போதிய அவகாசம் இல்லை. மிகவும் தாமதமாகிக் கொண்டிருக்கிறது. எனவே இந்தியா சற்று வேகமாக செயல்படுவது நல்லது. அணு ஒப்பந்தம் நிறைவேறும் என்ற நம்பிக்கை எனக்கு உள்ளது என்றார்.