ஐ.மு. கூட்டணி அரசு மீது 'சார்ஜ் ஷீட்' போடும் இடதுசாரிகள்!

டெல்லி: ஐக்கிய முற்போக்குக் கூட்டணி, இடதுசாரிகளின் 'அரசியல் திருமண பந்தம்' அஸ்தமனத்திற்கு வரவுள்ள நிலையில், ஐக்கிய முற்போக்குக் கூட்டணி அரசின் தவறுகளை சுட்டிக்காட்டும் 'குற்றப் பத்திரிக்கை'யை இடதுசாரிகள் தயாரித்து வருகின்றனராம்.

சிபிஐ, சிபிஎம், புரட்சிகர சோசலிஷ கட்சி, பார்வர்ட் பிளாக் ஆகியவை இணைந்த இடதுசாரி முன்னணி, ஐக்கிய முற்போக்குக் கூட்டணி அரசின் தவறுகள், தோல்விகளை சுட்டிக் காட்டி, பட்டியலிட்டு இந்த 'குற்றப் பத்திரிக்கை'யை தயாரித்து வருகின்றன.

இதில், அணு சக்தி ஒப்பந்த விவகாரத்தில் மத்திய அரசு அளித்த உறுதிமொழிகள், அதிலிருந்து பின் வாங்கியது, செய்த குழப்பங்கள் உள்ளிட்டவை விரிவாக விளக்கப்படவுள்ளன.

இதுதவிர பண வீக்கம், விலைவாசி உயர்வு ஆகியவற்றை தடுக்க மத்திய அரசு நடவடிக்கை எடுக்காததும் இந்த 'குற்றப் பத்திரிக்கை'யில் இடம் பெறவுள்ளது.

மேலும், பொது செயல் திட்டத்தை மதிக்காமல் மத்திய அரசு நடந்து கொண்ட விதம் குறித்தும் விளக்கப்படவுள்ளது.

இதுதவிர சமாஜ்வாடி கட்சி தங்களுக்கு துரோகம் இழைத்து விட்டதாக கருதும் இடதுசாரிகள், காங்கிரஸ் - சமாஜ்வாடி இடையிலான புதிய பந்தத்தையும் இந்த 'குற்றப் பத்திரிக்கை'யில் இணைத்துள்ளனராம்.

'குற்றப் பத்திரிக்கை' தயாரிப்புடன், நாடு முழுவதும் சென்று, ஐக்கிய முற்போக்குக் கூட்டணி அரசின் தவறுகளை, குழப்பங்களை மக்களிடம் விளக்கும் வகையில் தேசிய அளவிலான பிரசாரத்திலும் இடதுசாரிகள் இறங்கியுள்ளனர்.

இடதுசாரி தலைவர்கள் நாடு முழுவதும் சென்று பொதுக்கூட்டங்களில் பேசவுள்ளனர். பிரமாண்டப் பேரணிகளை நடத்தவும் திட்டமிட்டுள்ளனர்.

--