'போர் வீரனை' போல செயல்படும் மன்மோகன்: யுஎஸ்

வாஷிங்டன்: அணு சக்தி ஒப்பந்தம் தொடர்பாக எழுந்துள்ள பிரச்சினையை மிகவும் சாதுரியமாக சமாளித்து சிறப்பாக செயல்படுகிறார் பிரதமர் மன்மோகன் சிங் என்று அமெரிக்கா பாராட்டு தெரிவித்துள்ளது.

நாடாளுமன்றத்தில் மன்மோகன்சிங்அரசு மீதான நம்பிக்கைத் தீர்மானம் வெற்றி பெற்றுள்ளது குறித்து அமெரிக்கா கருத்து தெரிவித்துள்ளது.

இதுகுறித்து வெள்ளை மாளிகை செய்தித்தொடர்பாளர் டானோ மொரீனா செய்தியாளர்களிடம் பேசுகையில், போர்வீரனைப் போல மன்மோகன் சிங் செயல்படுகிறார். அரசியல் கட்சிகளிடையே ஒருமமித்த கருத்தை ஏற்படுத்துவதில் சிறப்பாக செயல்பட்டு வருகிறார்.

இந்தியாவுக்கு இந்த ஒப்பந்தம் மிகச்சிறந்த ஒன்று. இந்த ஒப்பந்தத்திற்கு அமெரிக்காவில் நல்ல ஆதரவு நிலவுகிறது. இந்தியாவில் ஆதரவுகுறைவாகவே இருக்கிறது. இருப்பினும் நம்பிக்கையுடன் செயல்படுகிறார் மன்மோகன் சிங் என்றார் மொரீனா.

இனி வேகம் பிடிக்கும்-அமெரிக்க தூதர்:

நம்பிக்கைத் தீர்மானத்தில் மன்மோகன் சிங் அரசு வெற்றி பெற்றது குறித்து இந்தியாவுக்கான அமெரிக்க தூதர் டேவிட் மல்போர்ட் கூறுகையில், நம்பிக்கை வாக்கெடுப்பில் இந்திய அரசு வெற்றி பெற்றுள்ளதன் மூலம் இனி அணு சக்தி ஒப்பந்தம் தொடர்பான செயல்கள் வேகம் பிடிக்கும். ஒப்பந்தத்தை விரைவில் செயல்படுத்த இந்திய அரசுடன் இணைந்து அமெரிக்க அரசு செயல்படும் என்றார்.