எம்.பிக்களுக்கு லஞ்சம்-வீடியோ ஆதாரம் வழங்கியது சிஎன்என்

டெல்லி: 3 பாஜக எம்.பிக்களுக்கு லஞ்சம் கொடுக்கப்பட்டது தொடர்பான வீடியோ டேப்பை சிஎன்என் ஐபிஎன் தொலைக்காட்சி நிறுவனம் சபாநாயகர் அலுவலகத்தில் ஒப்படைத்துள்ளது.

3 பாஜக எம்.பிக்களுக்கு சமாஜ்வாடிக் கட்சியினர் கோடிக்கணக்கில் லஞ்சம் கொடுத்ததாக கூறிஅந்தப் பணத்தை லோக்சபாவில் கொட்டி பரபரப்பை ஏற்படுத்தியது பாஜக.

இதுகுறித்த வீடியோ ஆதாரமும் இருப்பதாக தெரிவித்தது. சிஎன்என் டிவியும், அதுதொடர்பான வீடியோ ஆதாரம் தங்களிடம் உள்ளதாகவும், அதை சபாநாயகரிடம் ஒப்படைப்போம் எனவும் தெரிவித்தது.

இந்த வீடியோ ஆதாரம் இதுவரை தனக்கு வரவில்லை என்று சபாநாயகர் சோம்நாத் சாட்டர்ஜி நேற்று தெரிவித்திருந்தார். இந்த நிலையில் நேற்று மாலை இந்த வீடியோ டேப்பை சிஎன்என் டிவியின் ராஜ்தீப் சர்தேசாய் சபாநாயகர் அலுவலகத்தில் ஒப்படைத்தார்.

இதைத் தொடர்ந்து சபாநாயகர் விசாரணையை தொடங்குவார் எனத் தெரிகிறது.