சோம்நாத் சபாநாயகராக நீடிக்க காங். ஆதரவு

டெல்லி: சபாநாயகர் பதவியில் சோம்நாத் சாட்டர்ஜி நீடிப்பதில் எந்தவித பிரச்சினையும் இல்லை என்று காங்கிரஸ் கட்சி கருத்து தெரிவித்துள்ளது.

கட்சியின் உத்தரவை ஏற்று சபாநாயகர் பதவியை ராஜினாமா செய்ய மறுத்ததால், சோம்நாத் சாட்டர்ஜியை நேற்று மார்க்சிஸ்ட் கம்யூனிஸ்ட் கட்சியின் பொலிட்பீரோ, அடிப்படை உறுப்பினர் பதவியிலிருந்து நீக்கியது.

இதுகுறித்து காங்கிரஸ் செய்தித் தொடர்பாளர் ஜெயந்தி நடராஜன் கருத்து தெரிவிக்கையில்,சோம்நாத் சாட்டர்ஜி மார்க்சிஸ்ட் கம்யூனிஸ்ட் கட்சியிலிருந்து நீக்கப்பட்டது அசாதாரணமானது. இருப்பினும் இதனால் அவர் சபாநாயகர் பதவியில் நீடிப்பதில்எந்தவிப் பிரச்சினையும் இல்லை.

சபாநாயகராக தேர்ந்தெடுக்கப்பட்ட பின்னர் அந்த எம்.பி. எந்தக் கட்சியையும் சாராதவராகி விடுகிறார். சோம்நாத்தைப் பொறுத்தவரை, அவர் எந்தக் கட்சியையும் சேராதவராக இருக்கும் வரையில், தாராளமாக சபாநாயகர் பொறுப்ப அவர் வகிக்கலாம்.

தற்போதைய சபாநாயகரே தொடர்ந்து பதவியில் நீடிக்க வேண்டும் என காங்கிரஸ் விரும்புகிறது. பாராளுமன்ற மரபுப்படி, சபாநாயகர் மீது மார்க்சிஸ்ட் கம்யூனிஸ்ட் கட்சி எடுத்துள்ள நடவடிக்கை வரலாறு காணாதது. இருப்பினும் இது உள்கட்சி விவகாரம். இதில் காங்கிரஸ் தலையிட முடியாது.

சபாநாயகர் பதவியில் சோம்நாத் சாட்டர்ஜி சிறப்பாக செயல்படுகிறார். நல்ல சபாநாயகராக இருக்கிறார். நியாயமாகவும், நேர்மையாகவும் நடந்து கொள்கிறார்.

சோம்நாத் சாட்டர்ஜி சபாநாயகர் பொறுப்பில் நீடித்து வருவதால், புதிய சபாநாயகரை தேர்வு செய்வதற்கான அவசியமே இல்லை என்றார் ஜெயந்தி நடராஜன்.