பொது சிவில் சட்டம்: எதிர்த்து முஸ்லீம் லீக் கையெழுத்து இயக்கம்

நாகப்பட்டனம்: பொது சிவில் சட்டத்தை எதிர்த்து இந்தியா முழுவதும் கையழுத்து இயக்கம் நடத்தப்படும் என இந்திய யூனியன் முஸ்லீம் லீக் தலைவர் காதர் மொஹைதீன் எம்.பி தெரிவித்தார்.

நாகப்பட்டினத்தில் நடந்த முஸ்லீம் லீக் பொதுக்குழு கூட்டத்தில் அவர் பேசுகையில், பாரதிய ஜனதா கட்சி ஆட்சிக்கு வந்தால் பொது சிவில் சட்டத்தை கொண்டு வருவதாக அறிவித்துள்ளது. இந்த சட்டம் இந்தியாவிற்கு சாத்தியம் இல்லாத ஒன்று. இதற்கு வழி வகை செய்யும் இந்திய அரசியல் சட்டம் 44 வது பிரிவை நீக்க வலியுறுத்தப்படும்.

அதே போன்று பொது சிவில் சட்டத்தை கண்டித்தும் இந்தியா முழுவதும் 10 கோடிக்கு மேற்பட்ட சிறுபான்மை மக்களிடம் கையெழுத்து பெற்று, அது குடியரசுத் தலைவரிடம் ஒப்படைக்கப்படும்.

வரும் பாராளுமன்ற தேர்தலில் எங்களது கோரிக்கைகளை ஏற்கும் கட்சிகளுடன் கூட்டணி அமைக்கப்படும் என்றார் அவர்.