பிஎஸ்என்எலை புறக்கணித்த தெற்கு ரயில்வே

சென்னை: அலுவலர்களுக்கு செல்போன் இணைப்பு வழங்கும் உரிமையை ஏர்டெல் நிறுவனத்துக்கு அனுமதித்து, பிஎஸ்என்எல் நிறுவனத்தை புறக்கணித்துள்ளது தெற்கு ரயில்வே.

கடந்த 2006ம் ஆண்டு ஆகஸ்ட் மாதம் முதல் தெற்கு ரயில்வே மண்டலத்துக்கு உட்பட்ட தமிழகம், புதுச்சேரி, கேரளா, கர்நாடகம், ஆந்திரா ஆகிய மாநிலங்களின் சில பகுதிகளில் சுமார் 5,000 அலுவலர்களுக்கு முதன் முறையாக செல்போன் இணைப்பு வழங்கப்பட்டது.

இதில் சென்னை மற்றும் தமிழகம், புதுச்சேரி தொலைத் தொடர்பு வட்டத்திற்குட்பட்ட பகுதிகளில் ரயில்வே அலுவலர்கள் 3,050 பேருக்கு செல்போன் இணைப்புக்கான சிம்கார்டுகளை பிஎஸ்என்எல் வழங்கியது.

இந்த சிம்கார்டுகளைப் பெற்றுள்ள தெற்கு ரயில்வே அலுவலர்கள், தங்களுக்குள் கட்டணம் மற்றும் கால வரம்பின்றி தொடர்பு கொண்டு பேசும் வகையில் ஒருங்கிணைந்த "விடிஎன்-சியூஜி' வசதியைப் பெற்றனர்.

மேலும் இதர செல்போன் இணைப்புகளுடன் மாதம் தோறும் ரூ.300 வரை பேசுவதற்கும் சலுகை அளிக்கப்பட்டது. இந்த பிளான் 525 திட்டத்தின் கீழ் ரயில்வே அலுவலர்களுக்கு பல்வேறு சிறப்பு சலுகைகளையும் பிஎஸ்என்எல் வழங்கியது.

இந்நிலையில், கடந்த ஜூலை தொடக்கத்தில் பிஎஸ்என்எல் வழங்கிய சேவையை தெற்கு ரயில்வே முடிவுக்குக் கொண்டு வந்தது. இதையடுத்து ஜூலை 7ம் தேதி முதல் தனது அலுவலர்களுக்கு சிம்கார்டுகளை வழங்குமாறு ஏர்டெல் நிறுவனத்துக்கு தெற்கு ரயில்வே அனுமதி வழங்கியது. இது பிஎஸ்என்எல் நிறுவத்தை அதிர்ச்சியடைய செய்துள்ளது.

கட்டண விகிதம் அதிகமாக இருப்பதை காரணமாக தெற்கு ரயில்வே அதிகாரிகள் கூறியதாகத் தெரியவந்துள்ளது. இதையடுத்து, கட்டண விகிதத்தை குறைக்கவும் பிஎஸ்என்எல் முன்வந்தது.

ஆனால், ரயில்வே வாரியத்தின் உத்தரவின்பேரில், சிம்கார்டு வழங்க ஏர்டெல் நிறுவனத்துக்கு அனுமதி வழங்கப்பட்டு விட்டதாக தெற்கு ரயில்வே அதிகாரிகள் தங்களது நிலையைத் தெரிவித்தனர்.

இதனால், ரயில்வே துறை மூலம் கிடைக்கும் ரூ.3 கோடியை பிஎஸ்என்எல் இழந்துள்ளது. அரசுத் துறைகளே ஒன்றுக்குள் ஒன்று புறக்கணித்திருப்பது அதிர்ச்சியளிப்பாதாக இருதரப்பு ஊழியர்களும் தெரிவித்துள்ளனர்.