இங்கிலீஷ்-ஆங்கிலேயர்களை விட இந்தியர்கள் 'சூப்பர்'!

லண்டன்: ஆங்கிலத்தை தாய் மொழியாகக் கொண்ட பிரிட்டிஷ்காரர்களை விட இந்தியர்கள்தான் ஆங்கிலத்தை சிறப்பாக பேசுவதாக கல்வியாளர்கள் தெரிவித்துள்ளனர்.

இங்கிலாந்து பல்கலைக்கழகங்களில் படித்து வரும் இந்திய மாணவர்கள் மற்றும் பிரிட்டிஷ் மாணவர்களிடையே நடத்தப்பட்ட ஆய்வில் இது தெரிய வந்துள்ளதாக அவர்கள் தெரிவித்துள்ளனர்.

பிரிட்டிஷ் மாணவ, மாணவியரை விட இந்திய மாணவ, மாணவியரின் ஆங்கில உச்சரிப்பும், ஆங்கில மொழியை கையாளும் திறமையும் சிறப்பாக உள்ளதாம்.

ஸ்பெல்லிங், உச்சரிப்பு, இலக்கண சுத்தம் இந்தியர்களிடம் சிறப்பாக உள்ளதாம். உண்மையில் ஆங்கிலத்தை குண்டக்க மண்டக்க பேசுவது பிரிட்டிஷ்காரர்கள்தானாம்.

ஆங்கிலத்தை அடிப்படை குலையாமல் இந்தியர்கள் பேசுகிறார்களாம். வகுப்பறைகளில் இந்தியா மற்றும் பிற நாடுகளின் மாணவ, மாணவியர் சிறப்பாக ஆங்கிலம் பேசுகிறார்கள். அதேசமயம், பிரிட்டிஷ் மாணவ, மாணவியரிடம் ஆங்கிலத்தில் முழுமை இல்லையாம்.

குறிப்பாக ஸ்பெல்லிங் மிஸ்டேக் செய்வது ஆங்கிலேயர்கள்தானாம். குறிப்பாக 'there' என்று சொல்வதற்குப் பதில் 'their' என்றும், 'whose' என்று சொல்வதற்குப் பதில் 'who's' என்றும், 'truly' என்று சொல்வதற்குப் பதில் 'truely' என்றும், 'occurred' என்று சொல்வதற்குப் பதில் 'occured' என்றும், 'speech' என்று சொல்வதற்குப் பதில் 'speach' என்றும் கூறுகிறார்களாம் ஆங்கிலேய மாணவர்கள்.

இந்திய வம்சாவளியைச் சேர்ந்த பேராசிரியர் ஒருவர் கூறுகையில், 2ம் ஆண்டு படிக்கும் பிரிட்டிஷ் மாணவ, மாணவியர் கூட ஆங்கிலத்தை சரிவர உச்சரித்துப் பேசுவதில்லை. மிகவும் மோசமான ஆங்கிலத்தையே அவர்கள் பேசுகிறார்கள். அவர்கள் எழுதுவதும் கூட தவறான ஆங்கிலம்தான்.

சில சமயங்களில் மாணவர்கள் என்ன சொல்ல வருகிறார்கள் என்பதைக் கூட எங்களால் புரிந்து கொள்ள முடிவதில்லை. அதேசமயம், இந்தியர்கள் உள்ளிட்ட வெளிநாட்டு மாணவ, மாணவியர் தாங்கள் சொல்ல வருவதை தெளிவான ஆங்கிலத்தில் குறிப்பிடுகின்றனர் என்றார்.

பக்ஸ் நியூ பல்கலைக்கழக பேராசிரியர் கென் ஸ்மித் கூறுகையில், அடிப்படை இலக்கணத்தைக் கூட ஆங்கிலத்தைத் தாய்மொழியாகக் கொண்ட மாணவ, மாணவியர் கடைப்பிடிப்பதில்லை. குறிப்பாக 'weird', 'seize', 'leisure' 'neighbour' போன்றவற்றின் ஸ்பெல்லிங்குகளை அவர்களால் சரியாக எழுதவோ, பேசவோ முடிவதில்லை என்கிறார்.

பிரிட்டிஷ் மாணவ, மாணவியரின் இந்த 'இங்கிலிபீஷ் திறமையைப்' பார்த்து பயந்து போயுள்ள சில பல்கலைக்கழகங்கள் தற்போது ஒரு வருட கால ஆங்கில டியூஷனுக்கும் ஏற்பாடு செய்கின்றனவாம்.

நம்ம ஊர் டிவிகளில் தமிழைக் கொலை செய்வது போல அங்கு ஆங்கிலத்ைத 'மர்டர்' செய்கிறார்கள் போலும்!