நேபாள பிரதமராக பிரசந்தா இன்று பதவியேற்பு

காத்மாண்ட்: நேபாள குடியரசின் முதல் பிரதமராக பிரசந்தார இன்று பதவியேற்கிறார். அதைத் தொடர்ந்து தனது அமைச்சரவை அமைக்கிறார்.

நேபாளத்தில் கடந்த ஏப்ரலில் நடந்த தேர்தலில் மாவோயிஸ்ட் தலைமையிலான கூட்டணி அதிக இடங்களை கைப்பற்றியது. புதிய பிரதமராக யாருக்கு பொறுப்பு வழங்குவது என்பதில் சிக்கலும், இழுபறியும் ஏற்பட்டது. மாவோயிஸ்ட் அமைப்பு தலைவர் பிரசந்தாவை (53) பலரும் முன்மொழிந்தனர்.

அந்நாட்டு நாடாளுமன்றத்தில் மொத்தம் 601 எம்பிக்கள் உள்ளனர். கடந்த 15ம் தேதி நடந்த புதிய பிரதமர் தேர்வில் 577 எம்பிக்கள் வாக்களித்தனர். பிரசந்தாவை எதிர்த்து நேபாள காங்கிரஸ் தலைவர் ஷெர் பகதூர் துபா போட்டியிட்டார். இதில் 464 ஓட்டுகள் பெற்று பிரசந்தா வெற்றி பெற்றார்.

இதையடுத்து நேபாள குடியரசின் முதல் பிரதமராக பிரசந்தா இன்று பதவியேற்கிறார். அவருக்கு நேபாள அதிபர் ராம்பரன் பதவிப் பிரமாணம் செய்து வைக்கிறார்.

புதிய அமைச்சரவையில் யார் யாருக்கு அமைச்சர் பதவி, அவர்களுக்கு வழங்கப்பட வேண்டிய துறை குறித்து மாவோயிஸ்ட், சிபிஎன், யுஎம்எல், மாதேசி மக்கள் உரிமை முன்னணி ஆகிய கட்சிகள் கடந்த இரண்டு நாட்களாக ஆலோசனை நடத்தி வருகின்றன.

கூட்டணி கட்சிகளிடையே ஒருமித்த கருத்து ஏற்பட்டதை அடுத்து இன்று புதிய அரசு பதவியேற்க உள்ளது. அமைச்சர் பதவி குறித்து இன்னும் இழுபறி நிலவுவதாக தெரிகிறது. இன்றோ அல்லது நாளையோ அமைச்சரவை அமைக்கப்படும் என்று அக்கட்சியின் மூத்த தலைவர் பாபுராம் பட்டாராய் கூறினார்.