பல் மருத்துவம்-26ம் தேதி அடுத்தகட்ட கவுன்சிலிங்

சென்னை: தனியார் பல் மருத்துவக் கல்லூரிகளில் காலியாக உள்ள இடங்களுக்கான கவுன்சிலிங் வரும் 26ம் தேதி முதல் 28ம் தேதி வரை நடக்கிறது.

இது தொடர்பாக மருத்துவக் கல்வி இயக்ககம் வெளியிட்டுள்ள செய்திக் குறிப்பில்,

தனியார் பல் மருத்துவக் கல்லூரிகளில் உள்ள காலி இடங்களுக்கு அடுத்தகட்ட கவுன்சிலிங் 26ம் தேதி முதல் 28ம் தேதி வரை சென்னை கீழ்ப்பாக்கத்தில் உள்ள மருத்துவக் கல்வி இயக்கக தேர்வுக்குழு அலுவலகத்தில் நடைபெறும்.

183.75 முதல் 178 வரை கட்-ஆப் மதிப்பெண் உள்ளவர்களுக்கு 26ம் தேதியும், 170 வரை கட்-ஆப் உள்ளவர்களுக்கு 27ம் தேதியும், 158.50 வரை கட்-ஆப் மதிப்பெண் பெற்றவர்களுக்கு 28ம் தேதியும் கவுன்சிலிங் நடக்கிறது.

கவுன்சிலிங்கிற்கான அழைப்புக் கடிதங்கள் மாணவர்களுக்கு தனித் தனியாக அனுப்பப்பட்டு வருகிறது. அழைப்புக் கடிதம் கிடைக்காத மாணவர்கள், கவுன்சிலிங் அட்டவணையில் குறிப்பிடப்பட்டுள்ள மதிப்பெண்களின் அடிப்படையில் கவுன்சிலிங்கில் கலந்து கொள்ளலாம் என்று கூறப்பட்டுள்ளது.