அத்வானிக்கு இ. யூனியன் முஸ்லீம் லீக் கோரிக்கை

தென்காசி: அமர்நாத் நில விவகாரத்தை மதப் பிரச்சனையாக்க வேண்டாம் என்று அத்வானிக்குக்கு இந்திய யூனியன் முஸ்லிம் லீக் கட்சி தலைவரும் எம்பியுமான கே.எம்.காதர்மொய்தீன் வேண்டுகோள் விடுத்துள்ளார்.

தென்காசியில் செய்தியாளர்களிடம் அவர் கூறியதாவது:

இம்மாதம் 30ம் தேதி சேலத்தில் மாநில செயற்குழு கூட்டம் நடைபெறுகிறது. கடந்த மாதம் 21ம் தேதி நடைபெற்ற மணிவிழா மாநாட்டின் தீர்மானங்களை நடைமுறைபடுத்துவது குறித்து இக்கூட்டத்தில் முடிவுகள் மேற்கொள்ளப்படும்.

அமர்நாத் நில விவகாரம் குறித்து எதிர்க்கட்சித் தலைவர் அத்வானி பிரசாரம் மேற்கொள்ளப்போவதாக அறிவித்துள்ளார். இது காஷ்மீர் மாநிலப் பிரச்னை. தேர்தலுக்காக அமைதியைக் கெடுத்துவிடக் கூடாது. இது மக்களைப் பாதிக்கும். மேலும் மதப் பிரச்னையாக உருவெடுத்துவிடும் என்றார்.