கலெக்டர் அலுவலக கழிப்பறையில் வீசப்பட்ட ஜெ. படம்

சேலம்: சேலத்தில் பழைய கலெக்டர் அலுவலக வளாகத்தில் உள்ள கழிப்பறையில் முன்னாள் முதல்வர் ஜெயலலிதாவின் படம் இருந்ததைப் பார்த்து அதிமுகவினர் போராட்டத்தில் குதித்தனர். அவர்களைப் போலீஸார் கைது செய்து அப்புறப்படுத்தினர்.

சேலத்தில் ரூ.25 கோடி மதிப்பில் புதிய கலெக்டர் அலுவலகம் கட்டப்பட உள்ளது. புதிய கலெக்டர் அலுவலக கட்டடத்துக்காக, பழைய கலெக்டர் அலுவலகம் காலி செய்யப்பட்டது.

பழைய அலுவலகத்தை காலி செய்த ஊழியர்கள், வேண்டாத பொருட்களை எல்லாம் அங்கேயே விட்டுச் சென்றுள்ளனர். பழைய போட்டோக்கள், ஆவணங்கள் சிலவற்றை, அங்குள்ள கழிவறையில் அரசு ஊழியர்கள் விட்டுச் சென்றனர்.

அதில் முன்னாள் குடியரசுத் தலைவர் அப்துல் கலாம், ஜெயலலிதா, அமைச்சர் வீரபாண்டி ஆறுமுகம் பங்கேற்ற விழாக்கள் தொடர்பான படங்கள் ஆகியவையும் அடங்கும்.

இதை அறிந்த அதிமுகவினர் கொதிப்படைந்து அங்கு திரண்டனர். சேலம் பழைய கலெக்டர் அலுவலகம் முன் மறியலில் ஈடுபட்டனர்.

போலீசார் விரைந்து வந்து அவர்களை சமாதானப்படுத்தினர். ஆனால் கலெக்டர் வர வேண்டும் என்று அதிமுகவினர் கூறியதால், போலீஸார் அவர்களைக் கைது செய்து அப்புறப்படுத்தினர்.