அதிமுக கூட்டணியில் இடதுசாரிகள் இணைவார்களா?

சென்னை: திமுக கூட்டணியிலிருந்து விலகப் போகும் இடதுசாரிக் கட்சிகள் தேசிய அளவில் அமையவுள்ள 3வது அணியில் அதிமுகவுடன் அணி சேருவார்களா என்ற எதிர்பார்ப்பு எழுந்துள்ளது. தமிழகத்தில் அதிமுக அணிக்கு இடதுசாரிகளைக் கொண்டு வருவது தொடர்பாக மதிமுக பொதுச் செயலாளர் வைகோ தீவிரமாக இறங்கியுள்ளதாகவும் கூறப்படுகிறது.

தேசிய அளவில், ஐக்கியமுற்போக்குக் கூட்டணிக்கு அளித்து வந்த ஆதரவை விலக்கிக் கொண்ட இடதுசாரிகள், புதிதாக உருவாகியுள்ள 3வது அணியில் இடம் பெற்றுள்ளனர். இந்த அணியில் அதிமுகவையும் சேர்க்க முயற்சிகள் நடந்து கொண்டிருக்கின்றன.

அதேசமயம், தமிழகத்தில் அதிமுக கூட்டணிக்கு இடதுசாரிகளைக் கொண்டு வர ஜெயலலிதா தீவிரம் காட்டி வருகிறார். இதற்காக அவர் வைகோ மூலம் இடதுசாரிகளுக்கு தூது விட்டுள்ளதாக தெரிகிறது.

இடதுசாரிகளை அதிமுக அணிக்கு இழுக்கும் முயற்சியில் இறங்கியுள்ள வைகோ, இடதுசாரி கட்சிகளின் அகில இந்திய தலைவர்களை சந்தித்துப் பேசியுள்ளார்.

விரைவில் தமிழக தலைவர்களுடன் பேச்சு நடத்தவும் அவர் திட்டமிட்டுள்ளார். பேச்சுவார்த்தை சுமூகமாக நடந்து முடிந்தால் அதிமுக அணிக்கு இடதுசாரிகள் வரக் கூடும்.

காங்கிரஸுடன் சேரக் கூடாது, காங்கிரஸ் இடம்பெற்றுள்ள கூட்டணியில் இருக்கக் கூடாது. இதற்காக ஒத்த கொள்கை உடைய கட்சிகளுடன் அணி சேருவது என்ற நிலைப்பாட்டை எடுத்துள்ள இடதுசாரிகள், அதிமுக அணிக்கு வரக் கூடிய சாத்தியக் கூறுகள் இருப்பதாக கூறப்படுகிறது.