ஜார்ஜியாவுடன் உறவு ரத்தாகிறது: தூதரகத்தை மூட ரஷ்யா முடிவு

மாஸ்கோ: ரஷ்யாவுடனான உறவை துண்டிக்கப் போவதாக ஜார்ஜியா கூறியுள்ளதால், தலைநகர் திபிலிசியில் உள்ள தனது தூதரகத்தை மூடப் போவதாக ரஷ்யா தெரிவித்துள்ளது.

இதுகுறித்து ரஷ்ய வெளியுறவுத்துறை செய்தித் தொடர்பாளர் ஆன்ட்ரி நெஸ்டரென்கோ கூறுகையில், ரஷ்யாவுடனான உறவை துண்டித்துக் கொள்ள ஜார்ஜியா முடிவு செய்துள்ளது. அப்படி நடந்தால் திபிலிசியில் உள்ள எங்களது தூதரகத்தையும் நாங்கள் மூட வேண்டியிருக்கும்.

இருப்பினும் ஏதேனும் ஒரு அலுவலகத்தை அங்கு நாங்கள் வைத்திருப்போம். ஜார்ஜியாவின் முடிவு துரதிர்ஷ்டவசமானது. வருத்தம் தருகிறது. இருப்பினும் இதற்கு நாங்கள் காரணமல்ல. ஜார்ஜியாதான் இதற்கு முழுப்பொறுப்பேற்க வேண்டும் என்றார்.

முன்னதாக ஜார்ஜியா துணை வெளியுறவு அமைச்சர் கிரிகோல் வஷாதே செய்தியாளர்களிடம் கூறுகையில், அப்காஷியா, தெற்கு ஒசேஷியாவை ரஷ்யா தனி நாடுகளாக அங்கீகரித்துள்ளது. எனவே அதனுடனா உறவை ஜார்ஜியா துண்டித்துக் கொள்ளும் என்றார்.

இந்த நிலையில், இன்னும் ஒரு வாரத்தில் ரஷ்ய - ஜார்ஜிய உறவுகள் முடிவுக்கு வரும் என்று தெரிகிறது.