உலகின் இளம் கோடீஸ்வரி இஷா அம்பானி

மும்பை: உலகின் முதல் பத்து கோடீஸ்வர வாரிசுகள் பட்டியலில் ரிலையன்ஸ் நிறுவன அதிபர் முகேஷ் அம்பானியின் 16 வயது மகள் இஷா அம்பானி இடம் பிடித்துள்ளார். இவர்தான் இந்தப் பட்டியலிலேயே மிகவும் இளைய வயதுக்காரர் என்பது குறிப்பிடத்தக்கது.

அமெரிக்காவின் போர்ப்ஸ் இதழ் உலகின் பத்து கோடீஸ்வர வாரிசுகளின் பட்டியலை வெளியிட்டுள்ளது. இதில் இந்தியர்கள் வரிசையில் இஷா அம்பானிக்கு 2வது இடம் கிடைத்துள்ளது.

தற்போது படித்து வரும் இஷா, விளையாட்டு, கலை, வர்த்தகம், பொருளாதாரம் உள்ளிட்ட பல்வேறு துறைகளில் விருப்பம் கொண்டவர், பல விருதுகளையும் பெற்றுள்ளார்.

பட்டியலில் லட்சுமி மிட்டலின் மகள் வனிஷா மிட்டல் பாட்டியா இந்திய கோடீஸ்வர வாரிசுகளிலேயே முதலிடத்தைப் பிடித்துள்ளார். இவரது திருமணம் 2004ம் ஆண்டு நடந்தபோது 60 மில்லியன் டாலர் செலவு செய்தார் லட்சுமி மிட்டல் என்பது குறிப்பிடத்தக்கது.

மிட்டலின் ஆர்சலர் மிட்டல் ஸ்டீல் நிறுவனத்தின் இயக்குநர்களில் ஒருவராக உள்ளார் வனிஷா.

வனிஷாவுக்கு ஒரே ஒரு சகோதரர் மட்டுமே உள்ளார் என்பதால் அவருக்கு பெரும் பங்கு கிடைக்கும் நிலை. இதனால் முதலிடத்தைப் பிடித்துள்ளார் வனிஷா. உலக கோடீஸ்வர வாரிசுகள் பட்டியலில் 4வது இடத்தில் உள்ளார் வனிஷா.

அதேபோல முகேஷ் அம்பானியின் ஒரே மகள் இஷா. உலக அளவில் 5வது இடத்தில் இருக்கிறார். இவருக்கு ரிலையன்ஸ் நிறுவனத்தில் 80 மில்லியன் டாலர் பங்கு உள்ளது.

போர்ப்ஸ் வெளியிட்டுள்ள பட்டியலில் 150 கோடீஸ்வரர்களின் வாரிசுகள் இடம் பெற்றுள்ளனர். முதலிடத்தில் இருப்பவர் பெர்னார்ட் அர்னால்ட்டின் மகள் டெல்பின் அர்னால்ட் கான்சியா.