'ஆபரேஷன் தாமரை' Vs 'ஆபரேஷன் கை'!

மங்களூர்: கர்நாடகத்தில், பிற கட்சியினரை இழுக்கும் வகையில் பாஜக தொடங்கியுள்ள ஆபரேஷன் தாமரை நடவடிக்கைக்கு எதிராக ஆபரேஷன் ஹேண்ட் என்ற இயக்கத்தை தொடங்கவுள்ளதாக முன்னாள் முதல்வரும், மூத்த காங்கிரஸ் தலைவருமான வீரப்ப மொய்லி தெரிவித்துள்ளார்.

இதுகுறித்து மங்களூரில் அவர் கூறுகையில், பிற கட்சியின் தலைவர்களை குறிப்பாக காங்கிரஸ் தலைவர்களை இழுப்பதற்காக ஆபரேஷன் லோட்டஸ் என்ற நடவடிக்கையை பாஜக தொடங்கியுள்ளது.

அதை எதிர்கொள்ள ஆபரேஷன் ஹேண்ட் என்ற இயக்கத்தை காங்கிரஸ் கட்சியும் மேற்கொள்ளும்.

பாஜகவின் ஆயுதத்தாலேயே அதனை நாங்கள் எதிர்கொண்டு வெல்வோம். இதுதொடர்பான விவரங்களை இப்போது வெளியிட முடியாது. வருகிற லோக்சபா தேர்தலில் பாஜக உள்ளிட்ட கட்சிகளுக்கு சரியான பதிலடியை காங்கிரஸ் தரும்.

கட்சியில் தேக்கமடைந்து நிற்கும் அசுத்த நீரை அப்புறப்படுத்தி விட்டு நன்னீரைப் பாய்ச்ச நடவடிக்கை எடுக்கப்படும். கட்சியில் இளைஞர்களுக்கு அதிக அளவிலான வாய்ப்புகள் வழங்கப்படும். கட்சியில் அவர்களுக்கு முக்கியத்துவம் அதிகரிக்கப்படும். அரசியலிலும் அவர்களுக்கு அதிக வாய்ப்பு வழங்கப்படும். கட்சியை பலப்படுத்த இளைஞர்கள் தேவை என்றார்.