'சங் பரிவார்'களுக்கு தடை: காங். கோரிக்கை

டெல்லி: பஜ்ரங் தளம், விஸ்வ இந்து பரிஷத் போன்ற அமைப்புகளை தடை செய்ய வேண்டும் என மத்திய அரசுக்கு காங்கிரஸ் கோரிக்கை விடுத்துள்ளது.

சமீபத்தில், சிமி போன்ற பயங்கரவாத அமைப்புகளின் செயல்பாடுகள் குறித்து வெள்ளை அறிக்கை வெளியி டவேண்டும் என்று பா.ஜ.க தலைவர் அத்வானி மற்றும் குஜராத் முதல்வர் மோடி ஆகியோர் கோரிக்கை விடுத்திருந்தனர்.

இந்த நிலையில் சங் பரிவார் அமைப்புகளை தடை செய்ய வேண்டும் என பதில் கோரிக்கை விடுத்துள்ளது காங்கிரஸ்.

சங் பரிவார் அமைப்புகளின் செயல்பாடுகள் குறித்தும் வெள்ளை அறிக்கை வெளியிடவேண்டும் என்று காங்கிரஸ் கட்சி கேட்டுக் கொண்டுள்ளது.

இது குறித்து காங்கிரஸ் செய்தி தொடர்பாளர் மனிஷ் திவாரி கூறுகையில், பஜ்ரங் தளம், விஸ்வ இந்து பரிஷத் மற்றும் சங் பரிவார் அமைப்புகளின் செயல்பாடுகளால் நாட்டின் ஒற்றுமைக்கும், ஒருமைப்பாட்டிற்கும் களங்கம் ஏற்படுவதுடன், நமது ஜனநாயகதுக்கும், மதசார்பற்ற தன்மைக்கும் அவப்பெயரை ஏற்படுத்துவதாக உள்ளது.

எனவே, இந்த அமைப்புகளை தடை செய்ய வேண்டும். இவற்றின் செயல்பாடுகள் குறித்து வெள்ளை அறிக்கை வெளியிட வேண்டும் என்றார்.