லட்சுமி மிட்டலுக்கு போர்ப்ஸ் வாழ்நாள் சாதனையாளர் விருது

சிங்கப்பூர்: உலகப் பெரும் பணக்காரர்களில் ஒருவரும், ஸ்டீல் அதிபருமான லட்சுமி மிட்டலுக்கு போர்ப்ஸ் இதழின் வாழ்நாள் சாதனையாளர் விருது வழங்கப்பட்டது.

சிங்கப்பூரில் நடந்த விழாவில் இந்த விருது மிட்டலுக்கு தரப்பட்டது. நிகழ்ச்சியில் மிட்டல் பேசுகையில், இது வாழ்நாள் சாதனையாளர் விருது என்றாலும் கூட நான் இளமையாகவே உணர்கிறேன். தொடர்ந்து இளமைத் துடிப்போடு செயல்படுவேன்.

இன்னும் நிறைய செய்ய வேண்டியுள்ளது. அதற்கேற்ற வயதும் என்னிடம் உள்ளதாக கருதுகிறேன். அதற்கு பொருத்தமானவனாகவும் நான் இருப்பதாக உணர்கிறேன் என்றார் அவர்.

மிட்டலுக்கு போர்ப்ஸ் இதழின் அதிபர் ஸ்டீவ் போர்ப்ஸ் விருதினை வழங்கினார்.

இந்தியாவைச் சேர்ந்த மிட்டல், உலக அளவில் ஸ்டீல் துறையில் கொடி கட்டிப் பறக்கிறார். சமீபத்தில் ஆர்சலர் நிறுவனத்தை அவர் கையகப்படுத்தினார். அதன் தலைவராகவும், தலைமை செயல் அதிகாரியாகவும் அவர் செயல்பட்டு வருகிறார்.

இந்தியா, இந்தோனேசியா, தாய்லாந்து ஆகிய நாடுகளில் தனது ஸ்டீல் தொழில் நிறுவனங்களை பல கோடி முதலீட்டில் அவர் நிர்மானித்துள்ளார்.