அத்வானி-இனி ரத யாத்திரைக்குப் பதில் கூட்டம்!

பெங்களூர்: பாஜக பிரதமர் வேட்பாளராக அறிவிக்கப்பட்டுள்ள எல்.கே.அத்வானியின் ஒரு மாத கால தேர்தல் பிரசார திட்டம் வெளியிடப்பட்டுள்ளது. இதில் அத்வானியின் டிரேட் மார்க் ரத யாத்திரை இடம் பெறவில்லை. மாறாக பிரசார கூட்டங்களே இடம் பெற்றுள்ளன.

அத்வானியின் டிரேட் மார்க்கே ரத யாத்திரைகள்தான். ஆனால் தற்போது அதில் பாஜக தலைமை மாற்றம் செய்துள்ளது. ரத யாத்திரைக்குப் பதில் வெற்றி முழக்க கூட்டங்களை பாஜக திட்டமிட்டுள்ளது.

லோக்சபா தேர்தலுக்காக தயாராகி வரும் பாஜக, அத்வானியின் ஒரு மாத கால பிரசார திட்டத்தை வெளியிட்டுள்ளது. பெங்களூரில் தொடங்கி ஹைதராபாத்தில் அக்டோபர் 25ம் தேதியுடன் இந்த ஒரு மாத கால பிரசார திட்டம் முடிவடைகிறது.

செப்டம்பர் 24ம் தேதி ஜார்க்கண்ட் மாநிலம் தும்காவில் அத்வானி பேசுகிறார். பின்னர் 25ம் தேதி சோம்நாத் மற்றும் போபாலிலும், 27ம் தேதி உ.பி. மாநிலம் மொராதாபாத்திலும், 28ம் தேதி குவஹாத்தியிலும், 29ம் தேதி ஷில்லாங்கிலும், அக்டோபர் 1ம் தேதி மகாராஷ்டிர மாநிலம் வாஷிமிலும் அத்வானி பேசுகிறார்.

அக்டோபர் 5ம் தேதி பரேலியிலும், 6ம் தேதி ஜோத்பூரிலும், அக்டோபர் 11ம் தேதி அருணாச்சல் பிரதேச மாநிலம் பாசிகாட்டிலும் பேசுகிறார்.

14ம் தேதி கோழிக்கோட்டிலும், 15ம் தேதி ராஞ்சியிலும், 18ம் தேதி வாரணாசியிலும் அத்வானி பேசுகிறார் என்று தெரிவிக்கப்பட்டுள்ளது.