இந்த ஆண்டு வருவாய் உயர்வு இருக்காது-இன்போசிஸ்
பெங்களூர்: சர்வதேச பொருளாதாரத்தில் ஏற்பட்டுள்ள சரிவு காரணமாக இந்த நிதி ஆண்டில் தங்களது வருவாய் கணிசமாகக் குறையும் என எதிர்பார்க்கிறது சாஃப்ட்வேர் துறையில் முன்னிலை வகிக்கும் இன்போசிஸ் நிறுவனம்.
அமெரிக்கா மற்றும் ஐரோப்பிய நாடுகளில் நிலவும் பொருளாதார ஸ்திரமற்ற நிலை, மிக்க் கடுமையான பாதிப்புகளை இன்போசிஸ் போன்ற நிறுவனங்களில் வருவாயில் ஏற்படுத்தும் என அந்நிறுவனத்தின் தலைமை நிர்வாகி கோபாலகிருஷ்ணன் தெரிவித்துள்ளார்.
கடந்த ஆண்டு இந்நிறுவனத்தின் வருவாய் ரூ. 167 பில்லியன்களாக இருந்தது. இதற்கு முந்தைய ஆண்டை விட 20 சதவிகிதம் இது அதிகம். ஆனால் இந்த முறை இதே போன்ற உயர்வு இருக்கும் என நம்ப முடியாது என்கிறார் கோபாலகிருஷ்ணன்.
இந்நிலையில் இங்கிலாந்தைச் சேர்ந்த சாஃப்ட்வேர் நிறுவனமான அக்ஸன் குழுமத்தை வாங்க 407 மில்லியன் பவுண்ட் வரை தர முன்வந்துள்ளது இன்போசிஸ். ஆனால் இந்த பேரம் இன்னும் படியவில்லை. போட்டி நிறுவனங்கள் மேலும் இந்த தொகையை உயர்த்தக் கூடும் எனத் தெரிகிறது.