தயாநிதி அதிமுகவில் சேருவார்-கூறும் ராமராஜன்

வேலூர்: முன்னாள் மத்திய அமைச்சரும், திமுக எம்.பியுமான தயாநிதி மாறன் விரைவில் அதிமுகவில் சேருவார். அதற்கான நாள் வெகு தூரத்தில் இல்லை என்று நடிகரும், அதிமுகவில் இருப்பவருமான ராமராஜன் தெரிவித்துள்ளார்.

நீண்ட காலமாக அதிமுகவில் இருந்து வருகிறார் நடிகர் ராமராஜன். ஒரு முறை எம்.பியாகவும் இருந்தார். ஆனால் அதன் பின்னர் கட்சியில் அவருக்குப் பெரிய அளவில் செல்வாக்கு இல்லாமல் போய் விட்டது.

இந் நிலையில் வேலூரில் நடந்த அண்ணா நூற்றாண்டு விழா பொதுக் கூட்டத்தில் ராமராஜன் சிறப்புரையாற்றினார்.

அப்போது அவர் பேசுகையில், தயாநிதி மாறன் விரைவில் அதிமுகவில் சேருவார் என குண்டைத் தூக்கிப் போட்டார். ராமராஜன் பேசுகையில்,

தயாநிதி மாறனுக்கும், அவரின் தாத்தாவுக்கும் இருந்த உறவு என்ன? இப்போது இருக்கும் உறவு என்ன? தயாநிதி மாறன் அதிமுகவில் சேரும் நாள் விரைவில் வரும்.

கடந்த ஆண்டு அண்ணா பிறந்த நாளில் கருணாநிதி தொடங்கிய டி.விக்கு கலைஞர் டி.வி. என்று பெயர் வைத்துக் கொண்டார். ஏன் அண்ணாவின் பெயரை வைக்கவில்லை. குறைந்த பட்சமாக இசையருவி டிவிக்காவது அண்ணா பெயரை வைத்திருக்கலாம்.

மூப்பனாரின் முதுகில் ஏறி ஆட்சியில் அமர்ந்தவர் கருணாநிதி. அப்போது, பிரதமராகும் வாய்ப்பு மூப்பனாருக்கு ஏற்பட்டபோது அதை தடுத்தவரும் கருனாநிதி தான்.

அதேபோல் டாக்டர் ராமதாசின் முதுகில் அமர்ந்து ஆட்சியை பிடித்தவர், தற்போது காங்கிரஸ் தயவு இருந்தால் போதும் என்கிறார் என்றார் ராமராஜன்.