திமுகவோடு போட்டி மதிமுக இணைப்பு எப்போது?

மதுரை: திமுகவில் விரைவில் இணையப்போவதாக போட்டி மதிமுகவை உருவாக்கிய எல்.கணேசன், செஞ்சி ராமச்சந்திரன் ஆகியோர் அறிவித்து பல மாதங்கள் ஆகியும் அதற்கான எந்த அறிகுறியும் இதுவரை காணவில்லை.

மதிமுகவில் இருந்து பிரிந்து சென்று போட்டி மதிமுகவை உருவாக்கினர் எல்.கணேசன் மற்றும் செஞ்சி ராமச்சந்திரன். தாங்கள் தான் உண்மையான மதிமுக என தேர்தல் கமிஷனில் முறையிட்டனர். ஆனால் இவர்களை எதிர்த்து மதிமுக பொதுச் செயலாளர் வைகோ தேர்தல் கமிஷனில் முறையீடு செய்தார்.

இரு தரப்பு வாதங்களை கேட்டறிந்த தலைமை தேர்தல் கமிஷன், வைகோ தலைமையிலான மதிமுகவே உண்மையானது என்று தீர்ப்பளித்தது. இதையடுத்து தங்களது ஆதரவாளர்களுடன் திமுகவில் விரைவில் இணையப் போவதாக கடந்த சில மாதங்களுக்கு முன்பு எல்.கணேசன் தெரிவித்திருந்தார்.

இணைப்பு விழா தேதி விரைவில் குறிக்கப்படும் என்றும் கூறப்பட்டது. ஆனால் பல நாட்களாகியும் இது பற்றி எந்த அறிவிப்போ தகவலோ வரவில்லை.

அதிமுகவில் இருந்த செல்வகணபதி கூட நொடிப் பொழுதில் திமுகவில் இணைந்து விட்டார்.

ஆனால் திமுகவில் இணையப் போவதாக அறிவித்த எல்.கணேசன், மற்றும் செஞ்சி ராமசந்திரன் மற்றும் அவர்களது ஆதரவாளர்கள் இணைப்பு விழா மட்டும் தள்ளிப்போவது ஏன் என்பது மர்மமாக உள்ளது. இதற்கு அரசியல் காரணங்கள் உள்பட பல காரணங்களால் இணைப்பு விழா தள்ளப்போடப்பட்டு வருவதாக கூறப்படுகிறது.