அரசியல்: ரஜினிக்கு ஆதரவு வெறும் 4.3% தான்

சென்னை: தமிழகத்தில் நடிகர் ரஜினி அரசியலுக்கு வருவதை மக்கள் விரும்பவில்லை என்று லயோலா கல்லூரி நடத்திய கருத்துக் கணிப்பில் தெளிவாக தெரியவந்துள்ளது.

அதே நேரத்தில் அரசியல் கட்சி தொடங்கியுள்ள நடிகர்களில் விஜயகாந்தின் தேமுதிக மிகப் பெரிய தாக்கத்தை ஏற்படுத்தும் என்றும் தெரியவந்துள்ளது.

சென்னை லயோலா கல்லூரியின் ஊடக கலைகள் துறை மாணவர்கள் கடந்த மாதம் தமிழகம் முழுவதும் 31 நாடாளுமன்ற தொகுதிகளில் 2,709 பேரிடம் கருத்து கணிப்பு நடத்தினர்.

இதில் 54 சதவீதம் பேர் ஆண்கள். 46 சதவீதம் பேர் பெண்கள். இதில் 15.6 சதவீகிதம் பேர் வரும் நாடாளுமன்ற தேர்தலில் முதன் முதலாக வாக்களிக்க உள்ளவர்கள்.

இவர்களிடம் நடத்திய கருத்துக் கணிப்பில் நடிகர் ரஜினிகாந்துக்கு அரசியல் ஆதரவு சுத்தமாக இல்லை என்று தெரியவந்துள்ளது.

ரஜினி நேரடி அரசியலில் ஈடுபட வேண்டும் என்று வெறும் 4.3 சதவீகிதம் பேர் மட்டுமே கூறியுள்ளனர்.

அவர் முழு நேர நடிப்பை மேற்கொள்ளலாம் என 45.8 சதவீதம் பேரும், அவர் பேசாமல் ஓய்வெடுப்பது நல்லது என்று 32.5 சதவீதம் பேரும், முழு நேர ஆன்மீகத்தில் ஈடுபடலாம் என 10.7 சதவீதம் பேரும் கருத்து தெரிவித்துள்ளனர்.

மேலும் 5.2 சதவீதம் பேர் அவர் முழு நேர சமூக சேவையில் ஈடுபடலாம் என கருத்து தெரிவித்துள்ளனர்.