முன்னெச்சரிக்கை: 2000 வேலைகளை ரத்து செய்த சுவிஸ் வங்கி!
ஜூரிச்: சுவிட்ஸர்லாந்தின் நம்பர் ஒன் வங்கியான யூனியன் பேங்க் ஆப் சுவிட்ஸர்லாந்து (சுவிஸ் வங்கியின் ஒரு அங்கம்) 2000 வேலையிடங்களை ரத்து செய்வதாக நேற்று அறிவித்துள்ளது.
சர்வதேச அளவில் ஏற்பட்டுள்ள பொருளாதார-நிதி நெருக்கடிகள் காரணமாக இந்த வங்கியின் முதலீட்டுப் பிரிவுக்கு ஏற்பட்டுள்ள பின்னடைவைச் சரிகட்டவே இந்த நடவடிக்கையை எடுத்துள்ளது சுவிஸ் வங்கி.
மேலும் பங்கு வர்த்தகத்தில் நிலையான தன்மையை ஏற்படுத்துவதற்காக, ஆன்லைன் வர்த்தகத்துக்கும் இந்த வங்கி இப்போது தடை விதித்துள்ளது.
இன்றைய சூழலில் வங்கியின் வருவாய் நிலையாக இல்லை. எனவே வருவாயை நிலைப்படுத்தவும், செலவைக் குறைக்கவும் சில நடவடிக்கைகளை எடுத்தால்தான், சர்வதேச நிதி நெருக்கடிகளிலிருந்து தப்பிக்க முடியும். எனவேதான் இந்த அளவு கடுமையைக் கடைப்பிடிக்க வேண்டியுள்ளது என சுவிஸ் வங்கி அறிவித்துள்ளது.
அமெரிக்கா மற்றும் பிரிட்டனில் வங்கிகள் வரிசையாக வீழ்ச்சியடைந்து வருவதால், அதன் பாதிப்பு தங்களை எட்டும் முன் இத்தகைய நடவடிக்கைகளில் இறங்கியுள்ளது சுவிஸ் யுபிஎஸ் வங்கி.