தாறுமாறாக ஓடிய சென்னை டவுன் பஸ் - 4 பேர் காயம்

சென்னை: சென்னை கீழ்ப்பாக்கம் பகுதியில் அரசுப் போக்குவரத்துக் கழக டவுன் பஸ் திடீரென தாறுமாறாக ஓடியதில், சாலையில் சென்ற 4 பேர் படுகாயமடைந்தனர்.

அய்யப்பன் தாங்கலில் இருந்து காலை 9.30 மணியளவில் 37ஜி என்ற டவுன் பஸ் வள்ளலார் நகர் நோக்கி சென்று கொண்டிருந்தது.

சேத்துப்பட்டு மேம்பாலத்தில் இருந்து இறங்கி வலது புறம் திரும்பி கீழ்ப்பாக்கம் மருத்துவமனை சிக்னல் அருகே வந்தபோது, திடீரென பஸ் தாறுமாறாக ஓடியது.

இதையடுத்து சாலையில் சென்ற நான்கு பேர் மீது பஸ் மோதியது. இதில் அவர்கள் படுகாயமடைந்தனர். உடனடியாக அவர்களை கீழ்ப்பாக்கம் அரசு மருத்துவமனைக்குக் கொண்டு சென்றனர்.

இந்த சம்பவத்தால் அப்பகுதியில் பெரும் பரபரப்பு ஏற்பட்டது.