நெஞ்சு வலி: அமைச்சர் தாஸ்முன்ஷி கவலைக்கிடம்

டெல்லி: மத்திய தகவல் ஒலிபரப்புத் துறை அமைச்சர் பிரியரஞ்சன் தாஸ்முன்ஷிக்கு கடுமையான நெஞ்சு வலி ஏற்பட்டதை அடுத்து டெல்லியில் உள்ள எய்ம்ஸ் மருத்துவமனையில் இன்று அதிகாலை சேர்க்கப்பட்டு சிகிச்சை பெற்று வருகிறார். எனினும் அவரது நிலைமை கவலைக்கிடமாக உள்ளதாக டாக்டர்கள் தெரிவித்தனர்.

அமைத்தர் தாஸ்முன்ஷிக்கு திடீரென்று இருதய கோளாறு ஏற்பட்டு இன்று அதிகாலை 2.30 மணிக்கு டெல்லியில் உள்ள எய்ம்ஸ் மருத்துவமனையில் சேர்க்கப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது. அவரது உடல்நிலை கவலைக் கிடமாக உள்ளது என்றும் அவருக்கு செயற்கை சுவாசக் கருவிகள் பொருத்தப்பட்டிருப்பதாகவும் டாக்டர்கள் தெரிவித்தனர்.

இன்று காலை திடீரென அவருக்கு சுவாசக் கோளாறு மற்றும் நுரையீரல் பாதிப்பு ஏற்பட்டதாகவும் உடனடியாக அவர் மருத்துவமனையில் அனு மதிக்கப்பட்டிருப்பதாகவும் எய்ம்ஸ் செய்தி தொடர்பாளர் ஒய்.கே.குப்தா தெரிவித்தார்.

அவசர சிகிச்சைப் பிரிவில் முதலில் அனுமதிக்கப்பட்ட தாஸ்முன்ஷி பின்னர் இருதய சிகிச்சைப் பிரிவுக்கு மாற்றப்பட்டார். தாஸ்முன்ஷியின் முக்கிய உடலுறுப்புகள் சரியாக வேலை செய்கின்றன. எனினும் அவரது உடல் நிலை கவலைக்கிடமாக உள்ளது என்றும் மருத்துவர்கள் தெரிவித்தனர்