பரபரப்பான சூழலில் நாடாளுமன்றம் நாளை கூடுகிறது!

டெல்லி: நாடாளுமன்ற குளிர்காலக் கூட்டத்தொடர் நாளை தொடங்குகிறது. இதில் இலங்கைத் தமிழர் பிரச்னை, அணு ஒப்பந்தம், தீவிரவாதம் உள்ளிட்ட பல பிரச்சனைகளை கிளப்பி மத்திய அரசை ஒரு பிடிபிடிக்க எதிர்கட்சிகள் தயாராகவுள்ளன.

அணு ஒப்பந்த விவகாரத்தில் மத்திய அரசுக்கு அளித்த ஆதரவை இடதுசாரிகள் விலக்கிக் கொண்டதை அடுத்து கட‌ந்த ஜூலை 22ம் தேதி நாடாளுமன்றத்தில் நம்பிக்கை வா‌க்கெடு‌ப்பு நடந்தது. இதில் மன்மோகன் சிங் தலைமையிலான ஐக்கிய முற்போக்கு கூட்டணி அரசு தப்பியது.

அதற்கு பிறகு கூடும் முதல் நாடாளுமன்ற கூட்டத் தொடர் நாளை தொடங்குகிறது. அடுத்த மாதம் 24ம் தேதி வரை நடக்கிறது. ஜூலை மாதத்திற்கு பிறகு, நாட்டில் வெடிகுண்டு தாக்குதல்கள், மதக் கலவரங்கள் என்று மத்திய அரசுக்கு பெரும் நெருக்கடியை ஏற்படுத்தியுள்ளன.

எதிர்கட்சியான பாஜக அணுஒப்பந்தம், பணவீக்கம், பொருளாதார வீழ்ச்சி, ராமர் பால விவகாரம் உள்ளிட்ட பிரச்சனைகளை எழுப்ப உள்ளது. இதுகுறித்து அக்கட்சி எம்பியும் முன்னாள் அமைச்சருமான ரவிசங்கர் பிரசாத் கூறியதாவது

அணு ஒப்பந்தம் தொடர்பாக நாடாளுமன்றத்தில் பிரதமர் மன்மோகன் அளித்த வாக்குறுதி காப்பாற்றப்பட்டதா என்பதை நாங்கள் அறிய விரும்புகிறோம் என்றார்.

கூட்டத்தின்போது எழுப்ப வேண்டிய பிரச்சனைகள் குறித்து கம்யூனிஸ்ட் தலைவர்கள் கூட்டம் டெல்லியில் நேற்று நடந்தது. பின்னர், அவ‌ர்க‌ள் கூ‌றியதாவது

அணு ச‌ச்‌தி ஒ‌த்துழை‌ப்பு ஒப்பந்த விவகாரத்தில் பிரதமரும், வெளியுறவு அமைச்சரும் தவறான தகவல்களைத் தந்து மக்களை திசை திருப்புகின்றனர். அணு ஒப்பந்த விவகாரத்தில் உள்ள உண்மைகளை மக்களுக்குத் தெரிய வைப்போம். விலைவாசி உயர்வு, சிறுபான்மையினர் மீது தாக்குதல் உள்ளிட்ட பல பிரச்சனைகளை எழுப்புவோம் என்றனர்.

ஈழத் தமிழர்கள் மீதான தாக்குதலை இலங்கை இராணுவம் உடனடியாக நிறுத்த மத்திய அரசு நடவடிக்கை எடுக்க வேண்டும். இல்லையென்றால், தமிழக எம்பிக்கள் ராஜினாமா செய்வதாக அறிவித்துள்ளனர். எனவே, இலங்கைப் பிரச்சனையும் நாடாளுமன்றத்தில் சூட்டைக் கிளப்பும் என்று தெரிகிறது.

இந்நிலையில், நாடாளுமன்ற விவகாரத்துறை அமைச்சர் வயலார் ரவி கூறுகையில், இந்த தொடரில் 71 சட்ட மசோதாக்கள், 2 நிதி மசோதாக்களை நிறைவேற்ற முடிவு செய்யப்பட்டுள்ளது. 16 மசோதாக்கள் அறிமுகம் செய்யப்படும். கூட்டத்தொடரை சுமூகமாக நடத்த எதிர்க்கட்சிகள் ஒத்துழைப்பு தர வேண்டும் என்றார்.