நெல்லை அருகே இலவச கலர் டிவி வெடித்தது

நெல்லை: நெல்லை அருகே அரசு வழங்கிய இலவச கலர் டிவி வெடித்ததால் பரபரப்பு ஏற்பட்டது.

நெல்லை அருகே பொன்னாக்குடி சிவன் கோயில் தெருவை சேர்ந்தவர் கோபால். விவசாயி. இவர் பாளை ஒன்றிய பாஜக தலைவராக பொறுப்பு வகித்து வருகிறார். கோபாலுக்கு முத்துலெட்சுமி என்ற மனைவியும், இந்து சரண்யா என்ற குழந்தையும் உள்ளது.

இவர் நேற்று அரசு வழங்கிய இலவச கலர் டிவியில் நிகழ்ச்சிகளை பார்த்துக் கொண்டிருந்தார். அப்போது திடீரென பலத்த சத்தத்துடன் டிவி வெடித்து சிதறியதுடன் தீப்பிடித்தும் எரிந்தது. இதையடுத்து வீட்டில் இருந்தவர்கள் பதறியடித்து ஓட்டம் பிடித்தனர்.

டிவிக்கு அருகில் இருந்த டிவிடி பிளேயர், மின் விசிறி மற்றும் உடைகளும் எரிந்து சாம்பலானது. மேலும் வீட்டிலுள்ள மின் இணைப்புகளும் கருகியது. இதனால் அங்கு பரபரப்பு ஏற்பட்டது.