ரஜினிக்கு டாக்டர் பட்டம்: கடைசி நேரத்தில் கைவிட்ட அழகப்பா பல்கலை!!

காரைக்குடி: புதிய நடிகர் ஒருவர் எதிர்ப்பு தெரிவித்ததால், ரஜினிக்கு டாக்டர் பட்டம் வழங்கும் திட்டத்தை கைவிட்டது காரைக்குடி அழகப்பா பல்கலைக் கழகம்.

காரைக்குடி அழகப்பா பல்கலைக் கழகத்தில் வரும் 24ம் தேதி, 21-வது பட்டமளிப்பு விழா நடக்கிறது. கவர்னர் சுர்ஜித் சிங் பர்னாலா தலைமையில் நடைபெறும் இந்த விழாவில் நடிகர் ரஜினிக்கு கவுரவ டாக்டர் பட்டம் வழங்குமாறு ரசிகர்கள் தரப்பில் கோரிக்கை வைக்கப்பட்டது.

இதுகுறித்து மகாராஷ்டிர ரஜினி ரசிகர் மன்றத் தலைவர் ஆதிமூலம், பல்கலைக்கழகப் பதிவாளருக்கு முறைப்படி கோரிக்கை மனு கொடுத்தார். இதைத் தொடர்ந்து பதிவாளர் இ. இளமதியன் அனுப்பிய கடிதத்தின் பேரில், ரஜினியின் விவரக் குறிப்புகளை பல்கலைக் கழக சிண்டிகேட்டுக்கு அனுப்பினார் ஆதிமூலம்.

இது குறித்து சிண்டிகேட் கூட்டத்தில் விவாதித்து இறுதி முடிவு எடுக்க பல்கலைக்கழக நிர்வாகம் ஏற்பாடு செய்திருந்தது.

ஆனால் கூட்டம் துவங்கும் முன்பே ரஜினிக்கு டாக்டர் பட்டம் வழங்கும் விஷயத்தில் திடீர் சர்ச்சை எழுந்தது. புதிய நடிகர் ஒருவர் தரப்பிலிருந்து இதற்கு கடும் ஆட்சேபம் தெரிவிக்கப்பட்டதாகக் கூறப்படுகிறது. ரஜினிக்கு கவுரவ டாக்டர் பட்டம் வழங்கக் கூடாது என அவர் சிண்டிகேட் உறுப்பினர்களிடம் கூறியதாகவும் தெரிகிறது.

இதனால் அந்த திட்டத்தையே கைவிட்டுவிட்டது பல்கலைக் கழகம். இதைத் தொடர்ந்து பல்கலை பதிவாளர் வெளியிட்டுள்ள அறிக்கையில், "21வது பட்டமளிப்பு விழாவில் யாருக்கும் கவுரவ டாக்டர் பட்டம் வழங்கப்போவதில்லை" என, அறிவித்துள்ளார்.

இதுகுறித்து பேசுகையில், நடிகர் ரஜினிக்கு கவுரவ பட்டம் வழங்கக் கோரி வந்த மனுவுக்கு மதிப்பளித்து பயோடேட்டா கேட்டோம். சிண்டிகேட் ஒப்புதலுக்கு கொண்டு செல்வதற்கு முன்பாகவே இது சர்ச்சைக்குரிய விஷயமாக்கப்பட்டுவிட்டது. எனவே அத்திட்டத்தையே நிராகரித்து விட்டோம். இது தொடர்பாக வேறு எந்த விஷயம் குறித்தும் பேச வேண்டாமே..., என்கிறார் பதிவாளர் இளமதியன்.