60 வயதில் அரசியலுக்கு வருவார் ரஜினி: சிரஞ்சீவி

டெல்லி: ரஜினி தனது 60வது வயதில் அரசியலுக்கு வருவார். இதுகுறித்து என்னிடம் அவர் கூறியுள்ளார் என்று தெலுங்கு மெகா ஸ்டாரும், பிரஜா ராஜ்ஜியம் கட்சித் தலைவருமான சிரஞ்சீவி தெரிவித்துள்ளார்.

சிஎன்என்-ஐபிஎன் தொலைக்காட்சிக்கு சிரஞ்சீவி அளித்த பேட்டியில் இத்தகவலை அவர் வெளியிட்டார்.

ஆந்திராவில் சமீபத்தில்தான் 'பிரஜா ராஜ்யம்' கட்சியைத் தொடங்கியுள்ளார் சிரஞ்சீவி. அரசியல் குறித்தும் தன் புதிய கட்சி குறித்தும் பல்வேறு சந்தர்ப்பங்களில் ரஜினியுடன் ஆலோசனை நடத்தி வருபவர், ரஜினிக்கு மிகவும் நெருக்கமானவராகப் பார்க்கப்படுபவர் சிரஞ்சீவி.

பேட்டியின் போது, ரஜினியின் அரசியல் குறித்து அவரிடம் கேட்கப்பட்டது.

"ரஜினி கட்டாயமாக அரசியலில் ஈடுபட வேண்டும். அவரிடம் இருந்து மக்கள் நிறையவே எதிர்பார்க்கின்றனர்", என்று அவர் பதில் கூறினார்.

ரஜினி தனது அரசியல் திட்டம் பற்றி உங்களுடன் விவாதித்துள்ளாரா என கேட்டதற்கு, "ஆமாம். பல நேரங்களில் விவாதித்துள்ளார். அப்போது, 'நான் 60 வயதில் அரசியலுக்கு வருவதே சரியாக இருக்கும்' என்று அவர் கூறியிருக்கிறார்," என்றார் சிரஞ்சீவி.

வரும் 2010-ம் ஆண்டு டிசம்பர் 12-ம் தேதியில் ரஜினிக்கு 60 வயது முடிந்து, 61-வது வயது தொடங்குகிறது.

சிரஞ்சீவியிடம் ரஜினிகாந்த் கூறியதை வைத்து நோக்கும்போது, 2010-ல் 60 வயது பூர்த்தியாகும் ரஜினி, 2011-ல் நடைபெறவுள்ள தமிழக சட்டமன்றத் தேர்தலுக்குள் அரசியலுக்கு வரக்கூடும் என்று தெரிகிறது.