விஜயகாந்துக்கு தகுதியே இல்லை-ராமதாஸ்

சென்னை: விஜயகாந்துக்கு தலைவராகும் தகுதியோ, அரசியல் நடத்தும் தகுதியோ கிடையாது என பாமக நிறுவனர் டாக்டர் ராமதாஸ் கூறினார்.

நிருபர்களிடம் அவர் கூறியதாவது:

நடிகர்களுக்கு ரசிகர் மன்றம் அமைக்கும் முட்டாள்தனமான நடவடிக்கை நமது நாட்டில் மட்டும் தான் உள்ளது. இந்த ரசிகர் மன்றத்தை அந்த நடிகர்கள் அரசியல் கட்சிகளாக மாற்றுகிறார்கள்.

ரசிகர் மன்றத்தை தங்கள் சுய நலத்துக்காக பயன்படுத்தி கொள்கிறார்கள். அப்பாவி இளைஞர்கள் மூளை சலவை செய்யப்பட்டு ஏமாற்றப்படுகிறார்கள். இது மன்னிக்க முடியாத குற்றம்.

அரசியலுக்கு யார் வேண்டுமானாலும் வரலாம், அதை நான் எதிர்க்கவில்லை. ஆனால் அரசியல் கட்சி நடத்துவது என்றால் அந்த கட்சிக்கு சிந்தனைகள், கொள்கைகள், திட்டங்கள், இலக்குகள் இருக்க வேண்டும்.

விஜயகாந்துக்கு தலைவராகும் தகுதியோ, அரசியல் நடத்தும் தகுதியோ கிடையாது.

எம்ஜிஆர், என்டிஆர் காலம் வேறு, இப்போதுள்ள நிலை வேறு. எம்ஜிஅர் கட்சி தொடங்கும் முன்பே அரசியலில் இருந்தார்.

எந்த ஒரு மக்கள் பணியும் செய்யாமல் கோடம்பாக்கத்தில் இருந்து செயின்ட் ஜார்ஜ் கோட்டைக்கு சென்று விடலாம் என்று கனவு காண்பதை ஏற்க முடியாது என்றார் ராமதாஸ்.