மும்பை இன்டியன்ஸ் அணியில் 15%-ஐ வாங்கிய ஜெயின்

மும்பை: ரிலையன்ஸ் அதிபர் முகேஷ் அம்பானிக்குச் சொந்தமான மும்பை இன்டியன்ஸ் ஐபிஎல் கிரிக்கெட் அணியின் 15 சதவீத பங்குகளை டாய்ஸ் வங்கியின் (Deutsche bank) உலக மார்க்கெட் பிரிவின் தலைவர் அன்சு ஜெயின் வாங்கியுள்ளார்.

லண்டனில் வசிக்கும் ஜெயின், தீவிரமாக கிரிக்கெட் 'வெறியர்'. அந்த வகையில் டெண்டுல்கர் தலைமையிலான இந்த அணியில் முதலீட்டைச் செய்துள்ளார்.

ஹர்பஜன் சி்ங், ஷான் பொல்லாக், சனத் ஜெயசூர்யா ஆகியோர் அடங்கிய இந்த அணியை 119.11 மில்லியன் டாலருக்கு முகேஷ் அம்பானி வாங்கியது நினைவுகூறத்தக்கது.

இந்த அணியின் ஏலத்தில் விஜய் மல்லையா உள்ளிட்ட பெரும் தலைகளுடன் மோதில் வென்றார் முகேஷ்.

இந் நிலையில் இதில் பங்குகளை வாங்கியுள்ள ஜெயின், இந்த அணிக்கு பிரிட்டிஷ் வீரர்களான ஆண்ட்ரூ பிலின்டாப், கெவின் பீட்டர்சன் ஆகியோரை இழுத்து வர திட்டமிட்டுள்ளதாகக் கூறப்படுகிறது.

ஜெர்மனின் முன்னணி வங்கியான டாய்ஸ் வங்கியை உலக அளவில் மாபெரும் வங்கியாக உருவெடுக்கச் செய்ததில் ஜெயினுக்கு முக்கிய பங்குண்டு. ஜெய்ப்பூரைச் சேர்ந்த இவரது பெயர் இந்த வங்கியின் சி.இ.ஓ. பதவிக்கும் அடிபட்டு வருவது குறிப்பிடத்தக்கது.

சமீபத்திய பொருளாதார நெருக்கடியிலும் கூட அரசின் உதவியைக் கோரி நிற்காத ஒரு சில ஐரோப்பிய வங்கிகளில் இந்த வங்கியும் ஒன்று.