கோவை ரயில்களில் மாற்றம்- பல ரயில்கள் ரத்து

சென்னை: கோவை ரயில் நிலைய யார்டில் பராமரிப்பு பணிகள் நடைபெறுவதால், சென்னையில் இருந்து செல்லும் சில ரயில்களில் ரத்து செய்யப்பட்டுள்ளன. மேலும் பல ரயில்கள் கோவை வரை செல்லாது என்றும் அறிவிக்கப்பட்டுள்ளது.

தெற்கு ரயில்வே வெளியிட்டுள்ள செய்திக் குறிப்பில்,

கோவை ரயில்வே யார்டை நவீனப்படுத்தும் பணி நடைபெறுவதால், சென்னை சென்ட்ரல்- கோவை இடையிலான ரயில் சேவையில் மாற்றம் செய்யப்பட்டுள்ளது. அதன் விவரம்:

தற்போது கோவை வழியாக செல்லும் அனைத்து மெயில் மற்றும் எக்ஸ்பிரஸ் ரயில்களும் வரும் 25ம் தேதி முதல் டிசம்பர் 12ம் தேதி வரை கோவை செல்லாது. அதற்கு பதிலாக அந்த ரயில்கள் அனைத்தும் இருகூர் வழியாக திருப்பி விடப்பட்டு பாடனூரில் நிறுத்தப்பட்டுவிடும்.

சென்னை சென்ட்ரல்- கோவை இன்டர்சிட்டி எக்ஸ்பிரஸ் ரயில் இம் மாதம் 26, 29 மற்றும் டிசம்பர் 2,5,8,11 ஆகிய தேதிகளில் கோவை வரை செல்வதற்கு பதிலாக ஈரோட்டிலேயே நிறுத்தப்பட்டுவிடும்.

அதேபோல சென்ட்ரல் வழியாக கோவை செல்லும் ஜெய்ப்பூர்- கோவை எக்ஸ்பிரஸ் ரயில் வரும் 28ம் தேதி மற்றும் டிசம்பர் 5, 12 ஆகிய தேதிகளில் ஈரோட்டிலே நிறுத்தப்படும்.

சென்னை சென்ட்ரல்- மேட்டுப்பாளையம் நீலகிரி எக்ஸ்பிரஸ் ரயிலின் கோவை பகுதிகளுக்கான பெட்டிகள் 25ம் தேதி முதல் டிசம்பர் 12ம் தேதி வரை கோவை வடக்கு பகுதியிலே துண்டிக்கப்படும்.

ஒவ்வொரு சனிக்கிழமையும் சென்னை சென்ட்ரலில் இருந்து கோவைக்கு இயக்கப்படும் வாராந்திர எக்ஸ்பிரஸ் ரயில் வரும் 29ம் தேதி, டிசம்பர் 6, 13 ஆகிய தேதிகளில் முழுமையாக ரத்து செய்யப்படுகிறது.

அதேபோல் ஒவ்வொரு வெள்ளிக்கிழமையும் கோவையில் இருந்து சென்னை சென்ட்ரலுக்கு இயக்கப்படும் வாராந்திரி எக்ஸ்பிரஸ் ரயில் வரும் 28ம் தேதியும், டிசம்பர் 5, 12 ஆகிய தேதிகளிலும் முழுமையாக ரத்து செய்யப்படும்.

மேலும் வரும் 25ம் தேதி முதல் டிசம்பர் 12ம் தேதி வரை மங்களூர்- கோவை பயணிகள் ரயில் கோவை வரை செல்வதற்கு பதிலாக பாடனூர் வரை தான் செல்லும். இதே போல் கோவையில் இருந்து புறப்படுவதற்கு பதிலாக பாடனூரில் இருந்து புறப்பட்டு செல்லும்.

சோரனூர்- கோவை- திருச்சூர் பயணிகள் ரயில் பாடனூரிலேயே நிறுத்தப்படும். கோவை- பாலக்காடு- கோவை ரயில், கோவை- சோரனூர் ரயில் ஆகியவை போத்தனூரிலேயே நிறுத்தப்படும்.
ஈரோடு- கோவை பயணிகள் ரயில் கோவை வடக்கு பகுதியிலேயே நிறுத்தப்படும்.

கோவை- மங்களூர் (387, 388) பயணிகள் ரயில் பாடனூரில் நிறுத்தப்படும். திருச்சி- பாலக்காடு பயணிகள் ரயில் இருகூரில் நிறுத்தப்படும்.

அதே நேரத்தி்ல் சென்ட்ரலில் இருந்து கோவை செல்லும் சேரன் எக்ஸ்பிரஸ் ரயில், கோவை எக்ஸ்பிரஸ் ரயில், கோவையில் இருந்து சென்ட்ரலுக்கு வரும் இன்டர்சிட்டி எக்ஸ்பிரஸ் ரயில், லோக்மானியா திலக் எக்ஸ்பிரஸ் ரயில், நாகர்கோவில் எக்ஸ்பிரஸ் ரயில், ஜன சதாப்தி எக்ஸ்பிரஸ் ரயில்கள், நிஜாமுதீன்-கோவை கொங்கு எக்ஸ்பிரஸ் ரயில்கள், கோவை ராஜ்கோட் வாராந்திர எக்ஸ்பிரஸ் ஆகிய ரயில்களில் எவ்வித மாற்றமும் இல்லை.

இவ்வாறு தென்னக ரயில்வே அறிவித்துள்ளது.