மாருதியின் புதிய கார் 'ஏ ஸ்டார்' அறிமுகம்

டெல்லி: இந்தியாவின் முன்னணி் கார் நிறுவனமான மாருதி சுசூகி 'ஏ ஸ்டார்' என்ற புதிய சிறிய ரக காரை அறிமுகப்படுத்தியுள்ளது. இதன் விலை ரூ. 3.47 லட்சம்.

அதே நேரத்தில் பொருளாதார நெருக்கடி காரணமாக இந்த ஆண்டு மாருதி கார்களின் விற்பனை 50 சதவீதம் அளவுக்குக் குறையும் என்றும் அந்த நிறுவனம் தெரிவித்துள்ளது.

நிறுவனத்தின் தலைர் பார்கவா கூறுகையில், ஏ ஸ்டார் கார் இந்தியாவில் மட்டுமே தயாரிக்கப்படும். 3 வகைகளில், 9 நிறங்களில் இந்த கார் விற்பனைக்கு வரும். அடுத்த ஆண்டு முதல் இதை ஐரோப்பிய நாடுகளுக்கு ஏற்றுமதி செய்யவுள்ளோம்.

ஏ ஸ்டாரி்ன் குறைந்தபட்ச விலை ரூ. 3.47 லட்சமாக இருக்கும். இதன் உயரிய மாடல் (fully loaded) விலை ரூ. 4.12 லட்சமாக இருக்கும். இந்தியாவில் இந்த ஆண்டு 50,000 ஏ ஸ்டார் கார்களை விற்க திட்டமிட்டுள்ளோம் என்றார்.

இந்த கார் ஒரு லிட்டர் பெட்ரோலுக்கு 19.5 கி.மீ. வரை செல்லும் என்கிறது மாருதி நிறுவனம்.

விற்பனை சரிவு:

பொருளாதார நெருக்கடியால் கடந்த 2 மாதங்களாக நாட்டின் கார் விற்பனை 7 சதவீதம் அளவுக்கு விழுந்துவிட்ட நிலையில்,
இந்தக் காரை மாருதி சுசூகி அறிமுகப்படுத்தியுள்ளது.

இந்த ஆண்டில் தனது கார்களின் விற்பனை 50 சதவீதம் அளவுக்கு வீழ்ச்சி அடையும் என மாருதி நிறுவனமே தெரிவித்துள்ளது.