நக்கீரன் கோபாலுக்கு அதிமுக வக்கீல் நோட்டீஸ்

மேட்டுப்பாளையம்: சென்னை சட்டக் கல்லூரி மாணவர் மோதல் பிரச்சனையில் தன்னை தொடர்புபடுத்தி செய்தி வெளியிட்ட நக்கீரன் ஆசிரியர் கோபாலுக்கு மேட்டுப்பாளையம் தொகுதி அதிமுக எம்எல்ஏ சின்னராசு வக்கீல் நோட்டீசு அனுப்பியுள்ளார்.

மேட்டுப்பாளையம் தொகுதி அதிமுக எம்எல்ஏ சின்னராசு சார்பில் வக்கீல் பி.எச். மனோஜ்பாண்டியன் நக்கீரன் ஆசிரியர் கோபாலுக்கு அனுப்பியுள்ள வக்கீல் நோட்டீசில் கூறியிருப்பதாவது

எனது கட்சிக்காரர் சின்னராசு, மேட்டுப்பாளையம் தொகுதி சட்டமன்ற உறுப்பினராக பணியாற்றி வருகிறார். அவருடைய மதிப்பையும், கண்ணியத்தையும் சீர் குலைக்கும் வகையில் சென்னை சட்டக் கல்லூரி மாணவர் பிரச்சனையில் தொடர்புபடுத்தி நக்கீரனில் தவறான செய்தி வெளியிட்டுள்ளீர்கள்.

எனவே இச் செய்தி வெளியிட்டதற்கு நக்கீரன் பத்திரிகையின் அடுத்த இதழில் மன்னிப்பு வெளியிட வேண்டும், தவறினால் ரூ 25 லட்சம் இழப்பீடு கேட்டு மானநஷ்ட வழக்கு தொடரப்படும் என்று அதில் தெரிவிக்கப்பட்டுள்ளது.

இதேபோல சமீபத்தில் முதல்வர் கருணாநிதிக்கு அதிமுக பொதுச் செயலாளர் ஜெயலலிதா வக்கீல் நோட்டீஸ் அனுப்பினார் என்பது நினைவிருக்கலாம்.