கருணாநிதி-மாறன் சகோதரரர்கள் சந்திப்பு, மீண்டும் இணைந்தனர்

சென்னை: முதல்வர் கருணாநிதியை சன் டிவி நிர்வாக இயக்குநர் கலாநிதி மாறன் மற்றும் முன்னாள் மத்திய அமைச்சர் தயாநிதி மாறன் ஆகியோர் நேற்று சந்தித்தனர். இந்த சந்திப்பின்போது மு.க.அழகிரி மற்றும் உள்ளாட்சித் துறை அமைச்சர் மு.க.ஸ்டாலின் உள்ளிட்ட முதல்வரின் குடும்பத்தினர் உடன் இருந்தனர்.

முதல்வரின் மகன் மு.க.அழகிரி மற்றும் உள்ளாட்சித் துறை அமைச்சர் மு.க.ஸ்டாலின் ஆகியோர் இந்த சந்திப்புக்கு ஏற்பாடு செய்திருந்தனர். முதல்வரின் கோபாலபுரம் இல்லத்தில் இந்த உணர்ச்சிமிகு சந்திப்பு நிகழ்ந்தது.

பின்னர் அண்ணா அறிவாலயத்தில் செய்தியாளர்களைச் சந்தித்த முதல்வரிடம், இதுகுறித்து செய்தியாளர்கள் கேட்டபோது, மு.க.அழகிரி மற்றும் மு.க.ஸ்டாலின் ஆகியோரது முயற்சியால் இந்த சந்திப்பு நிகழ்ந்தது.

சந்திப்பின்போது கண்கள் பணித்தது, இதயம் இனித்தது என்றார்.

தொடர்ந்து அவர் பேசுகையில், இலங்கைத் தமிழர் பிரச்சினை தொடர்பாக பிரதமர் மன்மோகன் சிங்கை சந்திக்கச் செல்லும் அனைத்துக் கட்சி குழுவில் தயாநிதி மாறனும் இடம் பெறுவார் என்றார்.

சன் டிவியும், கலைஞர் டிவியும் இணையுமா என்ற கேள்விக்கு, கருத்து தெரிவிக்க விரும்பவில்லை என்று முதல்வர் பதிலளித்தார்.