மும்பை: ஐ.எஸ்.ஐக்கு எதிரான ஆதாரங்கள் சிக்கின

டெல்லி: மும்பைத் தாக்குதலில் பாகிஸ்தானின் ஐ.எஸ்.ஐக்குத் தொடர்பு உள்ளதற்கான ஆதாரங்கள் சிக்கியிருப்பதாக தகவல்கள் கூறுகின்றன.

தீவிரவாதிகளுக்குப் பயிற்சி அளித்தவர்கள் யார், எந்தெந்த இடத்தில் பயிற்சி வழங்கப்பட்டது என்பது உள்ளிட்ட அனைத்து விவரங்களும் அரசுக்குக் கிடைத்துள்ளது.

அமெரிக்காவிடம் கூடுதல் ஆதாரங்கள்

அதேசமயம், இந்தியாவை விட அமெரிக்காவுக்கு கூடுதல் விவரங்கள் கிடைத்துள்ளதாம். லஷ்கர் இ தொய்பா அமைப்பை இந்த சம்பவத்துடன் தொடர்புப்படுத்தும் முக்கிய ஆதாரங்களும், ஐஎஸ்ஐயின் தொடர்பை அம்பலப்படுத்தும் ஆதாரங்களும் அமெரிக்காவிடம் கிடைத்துள்ளது.

நேற்று முன்தினம் அமெரிக்க துணைத் தளபதி மைக் முல்லன் இஸ்லாமாபாத் சென்றிருந்தபோது, மும்பை சம்பவத்தில் பாகிஸ்தானின் தொடர்பு இருப்பதற்கான போதுமா ஆதாரங்கள் கிடைத்திருப்பதாக தெரிவித்தார்.

லஷ்கர் இ தொய்பா அமைப்பின் தலைவர் ஹபீஸ் சயீத்தை உடனடியாக கைது செய்ய வேண்டும். இனியும் பாகிஸ்தான் இந்த விஷயத்தில் மறுப்பு தெரிவிக்க முடியாது என அவர் பாகிஸ்தானுக்கு கண்டிப்புடன் தெரிவித்துள்ளார்.

பாக். அரசுக்குத் தொடர்பில்லை!

மிக மிக தெளிவாக திட்டமிட்டு இந்த செயலை தீவிரவாதிகள் அரங்கேற்றியுள்ளனர். இதற்காக அவர்களுக்கு ஐ.எஸ்.ஐ அதிகாரிகள் முழு அளவில் பயிற்சி அளித்துள்ளனர்.

தீவிரவாதிகளுக்கு ஐ.எஸ்.ஐ. பயிற்சி அளித்தது குறித்து ராணுவத்திற்குத் தெரியாது என்று கூறினால் அதை நம்புவது கடினம் என்று கூறும் அரசு வட்டாரம், பாகிஸ்தான் அரசுக்கு இந்த சதிச் செயலில் தொடர்பு இருப்பதாகத் தெரியவில்லை என்றும் தெரிவிக்கிறது.

சர்தாரியிடம் முழு அளவில் அதிகாரம் இல்லை என்பதும், அவருக்கும், ராணுவம் மற்றும் ஐ.எஸ்.ஐக்கும் இடையே யார் பெரியவர் என்ற சண்டை தீவிரமாக இருப்பதாகவும் அரசுத் தரப்பு தெரிவிக்கிறது.

புரட்சிக்கு திட்டமிட்ட ராணுவம்

இன்னும் தாங்கள்தான் பெரியவர்கள் என்று பாகிஸ்தான் அரசுக்கு நிரூபிக்கும் வகையில், மும்பையில் வெறியாட்டத்தை ராணுவம், ஐ.எஸ்.ஐயின் துணையுடன் நடத்தியிருக்கிறது.

மேலும், இதனால் இந்தியா - பாகிஸ்தான் இடையே பெரும் பதட்டம் ஏற்பட்டிருந்தால், அதைப் பயன்படுத்தி ஆட்சியைப் பிடிக்கவும் ராணுவம் திட்டமிட்டிருந்ததாகவும் தகவல்கள் கூறுகின்றன.

மும்பை போலீஸாரிடம் பிடிபட்ட தீவிரவாதி அஜ்மல் கஸாவ், விசாரணையின்போது ஐ.எஸ்.ஐக்கும், தங்களுக்கும் உள்ள தொடர்பு குறித்து புட்டுப் புட்டு வைத்துள்ளான் என்பது நினைவிருக்கலாம்.