டெல்லி-பாதியில் திரும்பிய ரஷ்ய அதிபர்

மாஸ்கோ: ரஷ்ய ஆர்த்தோடாக்ஸ் கிறிஸ்தவ மதப் பிரிவின் தலைவர் 2ம் அலெக்ஸியின் மறைவைத் தொடர்ந்து ரஷ்ய அதிபர் மெத்வதேவ் தனது இந்தியப் பயணத்தை ரத்து செய்து விட்டு மாஸ்கோ திரும்பினார்.

ரஷ்ய ஆர்த்தோடாக்ஸ் கிறிஸ்தவ மதப் பிரிவின் தலைவர் 2ம் அலெக்ஸி. இவரது இயற் பெயர், அலெக்ஸி மிக்கலோவிச் ரிட்ஜர். 79 வயதான 2ம் அலெக்ஸி, நேற்று ரஷ்யாவின் பெரிடெல்கினோ நகரில் மரணமடைந்தார்.

இந்தத் தகவல் கிடைத்ததும், இந்தியப் பயணத்தில் ஈடுபட்டிருந்த ரஷ்ய அதிபர் மெத்வதேவ் தனது பயணத்தை ரத்து செய்து விட்டு உடனடியாக மாஸ்கோ கிளம்பினார்.

மேலும் இத்தாலியின் பாரி நகரில், ரஷ்ய ஆர்த்தோடாக்ஸ் சர்ச் வளாகத்தை திரும்ப ஒப்படைக்கும் நிகழ்ச்சியையும் அவர் ரத்து செய்து விட்டார்.

தனது இந்தியப் பயணத்தின்போது குடியரசுத் தலைவர் பிரதீபா பாட்டீல், துணை குடியரசுத் தலைவர் ஹமீத் அன்சாரி, பிரதமர் மன்மோகன் சிங், வெளியுறவு அமைச்சர் பிரணாப் முகர்ஜி, காங்கிரஸ் தலைவர் சோனியா காந்தி ஆகியோரை சந்தித்தார் மெத்வதேவ். எதிர்க்கட்சித் தலைவர் அத்வானியையும் சந்தித்தார் மெத்வதேவ்.

வரலாற்றுச் சிறப்பு வாய்ந்த இந்திய - ரஷ்ய அணு சக்தி ஒப்பந்தம் உள்ளிட்ட 10 முக்கிய ஒப்பந்தங்களில் இரு நாடுகளும் கையெழுத்திட்டன என்பது குறிப்பிடத்தக்கது.