பாஜகவுக்கு ராமனும், அனுமனும் போதும்: கணேசன்
நாகர்கோவில்: பாஜகவுக்கு ராமனும், அனுமனும்தான் இனி கூட்டணி என்கிறார் தா.பாண்டிய். எங்களுக்கு ராமனும், அனுமனும் மட்டும் போதும் என்று தமிழக பாஜக தலைவர் இல.கணேசன் கூறியுள்ளார்.
நாகர்கோவில் வந்த பாஜக மாநில தலைவர் இல.கணேசன் செய்தியாளர்களிடம் பேசுகையில், தா. பாண்டியன் அதிமுகவுடன் கூட்டணி முடிவாகிவிட்டது என்ற வெற்றி களிப்பில் பாரதிய ஜானதாவுக்கு இனி ராமனும், அனுமனும்தான் இனி கூட்டணி என்று கூறுகிறார்.
ராமனும், அனுமானும் எங்களோடு துணை இருந்தால் போதும். தேர்தலில் வெற்றி பெறுவோம்.
தமிழகத்தில் கம்யூனிஸ்ட் கட்சிகளுடன் அதிமுக கூட்டணி அமைத்துள்ள நிலையில் மேற்கொண்டு என்ன செய்யலாம் என்பதை 9ம் தேதி நாளை சென்னையில் பாஜக உயர்நிலை குழு கூடி முடிவு செய்யும்.
பெட்ரோல், டீசல் விலை குறைப்பு ஓட்டுக்களையும், தேர்தலையும் மட்டுமே மனதில் வைத்து நடந்துள்ளது. அதிமுகவுடன் கூட்டு சேர இனி வாய்ப்பு இல்லை.
திமுக கூட்டணி பலவீனப்பட்டு கொண்டு இருக்கிறது. அதனால்தான் உயர்நிலை குழுவை கூட்டி வெளியேற்றிய பாமகவை அவர்கள் வரவேற்கின்றனர் என்றார் அவர்.